USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
İstintaq Abzas Media əməkdaşlarının yaxınları ilə ünsiyyətinə qoyulmuş qadağanı ləğv edib
“Abzas Media” işi üzrə həbs olunan jurnalistlərin yaxınları ilə telefon danışığı və görüşlərinə qoyulan məhdudiyyət götürülüb. Bu barədə jurnalist Nərgiz Absalamovanın vəkili Şəhla Hümbətova məlumat verib.
Vəkil bildirib ki, bu cinayət işi ilə bağlı həbs olunmuş şəxslər yaxınları ilə əlaqə saxlaya biləcəklər. Artıq “Abzas Media”nın direktoru Ülvi Həsənli ailəsi ilə görüşməyə müvəffəq olub. Baş redaktor Sevinc Vaqifqızının anası Ofeliya Məhərrəmova da qızı ilə telefonla danışdığını bildirib.
“Abzas Media” işi üzrə həbs olunmuş jurnalistlərə istintaq çərçivəsində ailələri ilə telefon danışığı və görüşlərə məhdudiyyət qoyulmuşdu. Jurnalistlərin vəkillərinin bununla bağlı məhkəmədə qaldırdıqları vəsatətlər rədd edilmişdi.
Noyabrın 20-də “Abzas Media”nın direktoru Ülvi Həsənli, onun müavini Məhəmməd Kekalov, noyabrın 21-də baş redaktor Sevinc Vaqifqızı, noyabrın 30-da reportyor Nərgiz Absalamova, dekabrın 13-də araşdırmaçı jurnalist Hafiz Babalı, son olaraq yanvarın 13-də jurnalist Elnarə Qasımova saxlanılıb.
Onlara qarşı Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham irəli sürülüb, barələrində həbs qətimkan tədbiri seçilib.
Jurnalistlər ittihamları rədd edirlər və həbslərini “Abzas Media”da dərc olunan korrupsiya araşdırmaları ilə əlaqələndirirlər.
