USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Almaniyada yaşayan azərbaycanlı mühacirlər yenidən aksiya keçiriblər – fəallar siyasi məhbusların azad olunmasını tələb edirlər
15 may 2025-ci il tarixində Almaniyanın paytaxtı Berlin şəhərində yerləşən Xarici İşlər Nazirliyinin (XİN) binası qarşısında azərbaycanlı siyasi mühacirlər növbəti dəfə aksiya təşkil ediblər. Aksiya iştirakçıları Azərbaycanda insan haqları pozuntularına, xüsusilə də siyasi məhbusların həbsi və onlara qarşı ədalətsiz davranışlara etiraz ediblər. Fəallar müxtəlif plakatlar və şüarlarla Azərbaycanın daxili siyasi vəziyyətinə, xüsusilə son zamanlar intensivləşən siyasi repressiyalara diqqət çəkməyə çalışıblar.
Aksiya iştirakçıları Almaniya hökumətinə və beynəlxalq ictimaiyyətə çağırış edərək Azərbaycanda hüquq və azadlıqların bərpası, siyasi məhbusların qeyd-şərtsiz azad olunması və insan haqlarının təmin edilməsi üçün daha sərt və prinsipial mövqe nümayiş etdirməyə çağırıblar.
Berlin polisi aksiyanın başlanmasından qısa müddət sonra hadisə yerinə gələrək aksiya iştirakçılarından etiraz tədbirinin səssiz və qaydalara uyğun şəkildə keçirilməsini tələb edib. Lakin bəzi fəallar bu tələblərə əməl etməyərək daha sərt formada etirazlarını davam etdirməyə çalışıblar. Bunun nəticəsində polis bir neçə fəalı aksiya ərazisindən uzaqlaşdırıb. Polis müdaxiləsi zamanı ciddi insidentin baş vermədiyi, lakin aksiya iştirakçıları ilə hüquq-mühafizə orqanları arasında qısa müddətli gərginliyin yaşandığı bildirilib.
Aksiyada çıxış edən fəallar qeyd ediblər ki, bu cür tədbirlər təkcə etiraz aksiyası deyil, həm də beynəlxalq ictimaiyyətə mesajdır. Onların fikrincə, Azərbaycanda siyasi motivlərlə həbs olunan şəxslərin sayı artır, müstəqil media və vətəndaş cəmiyyəti ciddi təzyiqlərlə üzləşir. Bu səbəbdən də azərbaycanlı mühacirlər xaricdə yaşadıqları ölkələrdə bu məsələyə diqqət çəkmək üçün davamlı olaraq ictimai tədbirlər təşkil edirlər.
Qeyd edək ki, bu, azərbaycanlı mühacirlərin Almaniya Xarici İşlər Nazirliyi qarşısında keçirdikləri ilk aksiya deyil. Son illər ərzində bu cür etiraz tədbirləri mütəmadi şəkildə təşkil olunur və əsas tələblər arasında siyasi məhbusların azad olunması, ifadə azadlığının təmin edilməsi və demokratik islahatların aparılması dayanır.
Aksiya sonda iştirakçıların Almaniya XİN-nə müraciət məktubu təqdim etməsi ilə başa çatıb. Məktubda Azərbaycanda insan haqları ilə bağlı vəziyyətin daha yaxından izlənilməsi və bu istiqamətdə konkret addımların atılması xahiş olunub.
