Azərbaycan Xalq Cəbhəsi Partiyasının (AXCP) Rəyasət Heyətinin üzvü Məmməd İbrahim və oğlu Mehdi İbrahim iyunun 5-də qara maskalı şəxslər tərəfindən saxlanılıb. Bu barədə məlumatı Məmməd İbrahim özü Meydan TV-yə verib.

Onun sözlərinə görə, səhər saat 11 radələrində xəstəxanaya gedərkən, 8 nəfər maskalı şəxs tərəfindən yolda saxlanılıb və evlərinə gətiriliblər. Evdə qısa müddətli baxış keçirilib, Məmməd İbrahim və həyat yoldaşına məxsus vaxtı keçmiş bank kartlarının fotoları çəkilib, mobil telefonlar isə müsadirə olunub.

Daha sonra ata və oğul 17 saylı Polis Şöbəsinə aparılıb. Məmməd İbrahim bildirir ki, şöbədə hər hansı fiziki və ya psixoloji təzyiqə məruz qalmayıblar:

“Orada bizi təhvil verib getdilər. Şöbədə bizə qarşı heç bir təzyiq olmadı. Sadəcə, çox fikirləşdilər, gələn-gedən oldu. Sonda zəng gəldi, bizi buraxdılar və telefonlarımızı qaytardılar. Dedilər ki, anlaşılmazlıq olub”.

AXCP funksioneri hesab edir ki, saxlanılmanın səbəbi izah edilməsə də, bu hadisə partiya üzvlərinə yönəlmiş son aylardakı həbslərlə bağlı ola bilər:

“Məni saxlayanda fikirləşdim ki, AXCP-yə yönəlik həbslərin davamıdır. Bunlar barədə proqnoz vermək olmur, amma yenə də ümid edək ki, həbs olunmaram”.

Qeyd edək ki, Məmməd İbrahim daha əvvəl üç dəfə siyasi məhbus həyatı yaşayıb. AXCP-nin hazırda ondan çox üzvü müxtəlif ittihamlarla həbsdədir. Partiya onların siyasi sifarişlə həbs edildiyini bildirir.

AXCP sədri Əli Kərimlinin mühafizəçilərindən biri – Niyaməddin Əhmədov “terroru maliyyələşdirmə” ittihamı ilə 13 il müddətinə azadlıqdan məhrum edilib. Digər mühafizəçi Kənan Basqal isə bu yaxınlarda bıçaqlama ittihamı ilə həbs olunub. May ayında daha iki nəfər – Kənan İsmayıl və Rahil Quliyev də inzibati qaydada həbs edilib.

Yerli hüquq-müdafiə təşkilatlarının hesabatlarına əsasən, hazırda ölkədə təxminən 357 nəfər siyasi məhbus var. Rəsmi qurumlar isə siyasi motivli həbslərin mövcudluğunu inkar edir.

Qarşı tərəfin mövqeyini işıqlandırmağa hazırıq.