“İşçi Masası” Həmkarlar İttifaqları Konfederasiyasının sədri, ictimai fəal Afiəddin Məmmədov 2 saylı cəzaçəkmə müəssisəsində saxlanma şəraitinin çox pis olduğunu bildirib. Onun yaxınlarının sözlərinə görə, həm fiziki, həm də psixoloji vəziyyəti ağırdır.

Yaxınları deyir ki, Məmmədov telefonla danışarkən şəraitdən şikayət edib, lakin söhbəti davam etdirmək istəyəndə zəng kəsilib:
“Dedi ki, orada vəziyyət pisdir. Daha detallı danışmaq istəyəndə zəngi söndürdülər. Sonra bir neçə dəfə yenidən zəng elədik, söndürürdülər. Daha sonra icazə verdilər, amma o barədə yenə danışanda, yenə söndürdülər”.

Onların sözlərinə görə, verilən vədlərə baxmayaraq, saxlanılma şəraitində heç bir dəyişiklik olmayıb və bu da Məmmədovun psixoloji durumunu pisləşdirib:
“Mətbəxdə, ərzaq saxlanılan yerdə siçanlar olur, ərzaqı yeyirlər. Antisanitar vəziyyətdir. Yatan yerdə də böyük siçovullar olur. Adam çoxdur, ayaqyolunda saatlarla növbələr olur”.

Yaxınları həmçinin fəalın lazımi tibbi müayinə ala bilmədiyini bildirir:
“Səhhətində problem olmuşdu, bizə də hər gün zəng edə bilmir, bizim də bundan xəbərimiz yox idi. Tibb məntəqəsinə getmişdi, həkim yerində olmayıb. Bir neçə gün sonra həkimin qəbuluna düşə bilib, onda da yolaverici dərman veriblər”.

Fəaliyyəti və həbsi

Afiəddin Məmmədovun sədri olduğu “İşçi Masası” Həmkarlar İttifaqları Konfederasiyası 2022-ci il martın 1-də yaradılıb və əsas məqsədi işçilərin hüquqlarını müdafiə etməkdir. O, əmək hüquqlarının pozulmasına qarşı keçirilən aksiyalarda fəal iştirak edib və buna görə dəfələrlə inzibati həbslərə məruz qalıb.

2023-cü il sentyabrın 20-də Məmmədov cinayət işi ilə həbs olunub. Ona qarşı Cinayət Məcəlləsinin 126.2.4 (xuliqanlıq niyyəti ilə qəsdən sağlamlığa ağır zərər vurma), 221.3 (silahla xuliqanlıq) və 228.4 (qanunsuz silah saxlama) maddələri ilə ittiham irəli sürülüb. 2024-cü il yanvarın 14-də məhkəmə ona 8 il həbs cəzası verib.

Hazırda onun saxlanma şəraitinin ağır olması ilə bağlı yaxınları ictimaiyyətə müraciət edirlər.