Həbsdə olan tədqiqatçı və sülh fəalı Bəhruz Səmədov saxlanıldığı 11 saylı Cəzaçəkmə Müəssisəsində cərimə kamerasına — “karser”ə salınıb.

Bu barədə oktyabrın 21-də onun nənəsi Zibeydə Osmanova ilə birlikdə müəssisəyə gedən ictimai fəal Əmrah Təhməzov məlumat verib. O, “Facebook” səhifəsində yazıb ki, Zibeydə Osmanovaya nəvəsi ilə görüş verilməyib və yalnız Penitensiar Xidmətə və Ombudsman Aparatına müraciətdən sonra müəssisə rəisinin müavini onlara izahat verməyə gəlib.

Rəis müavini bildirib ki, Bəhruz Səmədov oktyabrın 25-dək karserdə saxlanılacaq və bu müddətdə görüşlərə icazə verilmir.

Əmrah Təhməzov qeyd edib ki, o, fəalın “karser”ə salınma səbəbi barədə izahat almağa çalışsa da, rəhbərlik bunu “daxili qaydaların pozulması” ilə əsaslandırıb:

“Dedim, ikimiz də bilirik ki, onu heç nədən salmısınız ‘kars’a. Heç nə demədi. Deyir 25-i gələrsiz, görüş olacaq. Uzun söz davasından sonra gətirdiyimiz azuqəni içəri keçirdə bildik”.

Oktyabrın 20-də Bəhruz Səmədovun müəssisədə qapalı şəraitdə saxlanıldığı barədə məlumat yayılmışdı. Fəal bu barədə nənəsinə telefon zəngi zamanı xəbər verib.

Zibeydə Osmanovanın sözlərinə görə, nəvəsi bildirib ki, “zon” rəisi ona 1,5 ay qapalı otaqda saxlanıldıqdan sonra Umbakı Penitensiar Kompleksinə köçürüləcəyini deyib. O həmçinin “belə saxlanılmaqdansa, məni güllələsinlər” və “həyatıma qəsd edəcəyəm” kimi ifadələr işlədib.

Yaxınlarının bildirdiyinə görə, Bəhruz Səmədov həbsdə iki dəfə intihara cəhd edib, lakin hər dəfə son anda xilas olunub.

Məsələ ilə bağlı Penitensiar Xidmət hələlik açıqlama verməyib.

Qeyd edək ki, Çexiyanın Karlov Universitetinin doktorantı olan Bəhruz Səmədov 2024-cü il avqustun 21-də Dövlət Təhlükəsizliyi Xidmətinin əməkdaşları tərəfindən həbs edilib.
O, 2025-ci il iyunun 23-də Bakı Ağır Cinayətlər Məhkəməsinin hökmü ilə 15 il azadlıqdan məhrum edilib.

Səmədov dövlətə xəyanətdə ittiham olunur. Lakin o, məhkəmə proseslərində Ermənistanla əməkdaşlıq etmədiyini, Dağlıq Qarabağın Ermənistan ərazisi olduğunu demədiyini və həmişə sülh tərəfdarı olduğunu bildirib.