3 noyabr 2025-ci il tarixində Bakı Ağır Cinayətlər Məhkəməsində “Toplum TV işi” üzrə növbəti iclas keçirilib. Hakim Azər Tağıyevin sədrliyi ilə keçirilən proses şahid ifadələri zamanı gərginliklə yadda qalıb.

Məhkəmə tərkibinə etirazlar

İclasın əvvəlində III Respublika Platformasının qurucu üzvü Ruslan İzzətli hakim Azər Tağıyevə etiraz edərək onun prosesə qərəzli yanaşdığını bildirib. İzzətli hakimin əvvəlki iclaslarda şahidlərə təsir etdiyini vurğulayıb. Demokratik Təşəbbüslər İnstitutunun rəhbəri Akif Qurbanov və digər təqsirləndirilən şəxslər də bu etiraza qoşulub. Onlar hakimin şahidlərin təzyiq iddialarını araşdırmadığını, təqsirsizlik prezumpsiyasına zidd mövqe sərgilədiyini deyiblər.

Şahidlər: “İfadələr təzyiq altında alınıb”

Şahid kimi ifadə verən Şahin Məhərrəmli istintaqda dediklərini təzyiq altında imzaladığını, ifadəni oxumağa belə imkan verilmədiyini bildirib. O, istintaq sənədlərində Akif Qurbanovun qrantlarla bağlı avtomobili həyat yoldaşının adına keçirdiyi iddiasını təkzib edib. Eyni zamanda, Qurbanovun ondan 30 min manat borc istədiyini təsdiqləsə də, bunun dostlar arasında normal olduğunu vurğulayıb.

Keçmiş “Toplum TV” əməkdaşı, yazıçı Cavid Ramazanov da saxlanılarkən hüquqi yardım almadığını və təzyiq altında ifadə verdiyini deyib.

Məhkəmədə gərgin dialoqlar

“Toplum TV” aparıcısı Alya Yaqublu ifadə verərkən hakimlə arasında gərginlik yaşanıb. Bunun ardından Akif Qurbanov və Ələsgər Məmmədli etirazlarını ifadə ediblər. “Toplum TV” əməkdaşı Fərid İsmayılov isə hakimin şahidlərə qarşı əsəbi davranış göstərdiyini bildirərək, bu vəziyyətin istintaq dövründəki təzyiqləri təsəvvür etməyə imkan verdiyini deyib.

Növbəti iclasın tarixi məlum oldu

Hakimlər müşavirədən sonra çıxarılan qərarda məhkəmə tərkibinə edilən etiraz təmin edilməyib. Prosesin sonunda növbəti iclasın 24 noyabr tarixində keçiriləcəyi və şahid ifadələrinin davam etdiriləcəyi açıqlanıb.

İttihamlar və ümumi vəziyyət

“Toplum TV işi” üzrə ümumilikdə 10 nəfər təqsirləndirilir. Onların arasında Akif Qurbanov, Ruslan İzzətli, Ələsgər Məmmədli, Fərid İsmayılov, Əli Zeynal və digərləri var. Təqsirləndirilən şəxslər barəsində ilkin mərhələdə qaçaqmalçılıq ittihamı irəli sürülmüş, sonradan ittihamlar daha da ağırlaşdırılıb. Onlar bu işin siyasi sifariş olduğunu bildirirlər.