Bakı İstintaq Təcridxanasında saxlanılan dini inanclı şəxslər — Şərqiyyə Hüseynova, Şəhla Fərəcova, Nigar Bağırova və Aytən İbrahimova aclıq aksiyasına başlayıblar.

Bu barədə hüquq müdafiəçisi Arzu Abdulla Meydan TV-yə məlumat verib.

Onun sözlərinə görə, noyabrın 8-də Xəzər Rayon Məhkəməsində dini inanclı qadınların məhkəmə prosesi keçirilib. Prosesə hakim Ramilə Xəzri sədrlik edib. Fəal qeyd edib ki, təqsirləndirilən şəxslər məhkəmə qarşısına qrup halında deyil, ayrı-ayrılıqda çıxarılıblar.

Xatırladaq ki, avqustun 17-də sosial şəbəkələrdə Xəzər rayonu ərazisində ehsan paylayan bir qrup dini inanclı qadının polis tərəfindən zorakılığa məruz qaldığına dair görüntülər yayılmışdı. Onlar dini mərasimlər adı altında icazəsiz aksiya keçirməkdə ittiham olunurlar.

Daxili İşlər Nazirliyinin məlumatına görə, həmin vaxt Nigar Bağırova (38 yaş), Aytən İbrahimova (41 yaş), Şəhla Fərəcova (44 yaş), Xoşqədəm Quliyeva (50 yaş), Şərqiyyə Sadıqova (31 yaş) və Arzu Hüseynova (52 yaş) saxlanılmış, onların barəsində 3 ay müddətinə həbs qətimkan tədbiri seçilmişdi.

Sonradan məhkəmə qərarı ilə qadınların həbs müddəti daha 2 ay uzadılıb. Bu qərardan sonra onlar etiraz olaraq aclıq aksiyasına başlayıblar.

Arzu Abdulla bildirib ki, indiyədək qadınlara qarşı heç bir istintaq prosesi aparılmayıb:

“Onlar yalnız 3 ayda iki dəfə dindirilib. Bu şəraitdə istintaqın müddətinin uzadılması anlaşılan deyil.”

Məlumata görə, təcridxanada saxlanılan qadınlardan onlara qarşı irəli sürülmüş ittihamları etiraf etmələri və üzr istəmələri tələb olunub.