Həbsdə olan araşdırmaçı jurnalist Hafiz Babalının “Qafqazinfo” və “Baku TV” media qurumlarına qarşı qaldırdığı məhkəmə iddiaları üzrə proseslər davam edir. Bu barədə jurnalist həbsxanadan yayımladığı ictimaiyyətə müraciətində məlumat verib.

H.Babalının sözlərinə görə, artıq iki ilə yaxındır ki, həmin media orqanlarını onun haqqında böhtan xarakterli materiallar dərc etdiklərinə görə məhkəməyə verdiyi halda, yerli məhkəmələr iddialarını təmin etmir:

“Məhkəmə iclaslarında şəxsi iştirak hüququm təmin olunmur, iddia və şikayətlərim isə rədd edilir. Amma mən özümü mənəvi baxımdan qalib sayıram. Çünki məhkəmələr siyasi sifarişə boyun əyərək dövlət adından qanunsuz qərarlar çıxarmağa məcbur qalırlar. Mənim silahım isə daha güclüdür – qanun və həqiqət,” – deyə o bildirib.

Jurnalist qeyd edib ki, yaxın günlərdə “Qafqazinfo”ya qarşı Nərimanov Rayon Məhkəməsinin qərarından verdiyi apellyasiya şikayəti, eləcə də “Baku TV”yə qarşı Nəsimi Rayon Məhkəməsinə təqdim etdiyi iddia ərizəsi təmin edilməyib. O, şərəf və ləyaqətin, işgüzar nüfuzun müdafiəsi ilə bağlı özündən üzr istənilməsi, təkzib verilməsi və mənəvi zərərin ödənilməsi tələbləri irəli sürüb.

H.Babalı bildirir ki, məsələni Avropa İnsan Hüquqları Məhkəməsinə qədər aparmağa hazırdır. O, həmçinin hər iki media qurumunun rəhbər şəxsləri – “Qafqazinfo.az” MMC-nin direktoru Elbrus Seyfullayev və “Baku TV” MMC-nin direktoru Ramin Cəfərovu da ayrıca məhkəməyə verdiyini deyib. Həbsxana rəhbərliyinə təqdim etdiyi şikayət ərizələrinin hələlik poçt vasitəsilə çatdırılmasını təsdiq edən sənədləri almadığını bildirir.

Jurnalist, eyni zamanda, özü haqda tənqidi məqalələr yazan hökumətyönlü media nümayəndələrinə də mesaj göndərib:

“Qələmindən sui-istifadə edən və məni gözdən salmağa çalışanlara deyirəm: atdığınız daşlar bumeranq kimi geri qayıdacaq və həm sizin, həm də gizli himayəçilərinizin başına dəyəcək.”

Qeyd edək ki, Hafiz Babalı 2023-cü ilin dekabrında “Abzas Media işi” çərçivəsində saxlanılıb. 2024-cü il iyunun 20-də Bakı Ağır Cinayətlər Məhkəməsinin hökmü ilə o, Ülvi Həsənli, Sevinc Vaqifqızı və digər jurnalistlərlə birlikdə 9 il müddətinə azadlıqdan məhrum edilib. Təqsirləndirilən şəxslər ittihamları qəbul etmir, həbslərinin peşə fəaliyyətləri ilə bağlı olduğunu bildirirlər.