“Abzas Media işi” çərçivəsində 9 il azadlıqdan məhrum edilən “Azadlıq Radiosu” jurnalisti və iqtisadçı Fərid Mehralızadənin tərcümə etdiyi “Qızımla iqtisadiyyat söhbətləri” kitabı işıq üzü görüb. Bu barədə məlumatı iqtisadçının yaxınları “Abzas Media”ya təsdiqləyib.

Kitabın müəllifi yunan iqtisadçısı Yanis Varufakisdir. Əsər qlobal iqtisadiyyatın əsaslarını gündəlik həyatdan götürülən sadə nümunələrlə izah edir, pulun və bazarların mahiyyəti, əmək və kapital anlayışları, həmçinin müasir iqtisadi böhranların səbəbləri kimi mövzuları geniş şəkildə şərh edir.

“Kitab hər kəs üçün yazılıb” – Fərid Mehralızadə

Fərid Mehralızadə bildirib ki, əsərin məqsədi iqtisadiyyatın yalnız mütəxəssislər üçün deyil, hamı üçün anlaşılan olmasını göstərməkdir:

“İqtisadiyyatın sadəcə iqtisadçıların öhdəsinə buraxılacaq qədər sadə məsələ olmadığı inancı ilə yazılan kitabda iqtisadi proseslər hər kəsin anlayacağı şəkildə, qarışıq iqtisadi terminlər və riyazi hesablamalar olmadan izah edilir. Müəllif kitabı öz qızına xitabən yazsa da, mətn bütün yaş qruplarına uyğundur”.

Mehralızadənin sözlərinə görə, Varufakisin həm akademik təcrübəsi, həm də Yunanıstanın ən ağır böhran dövründə maliyyə naziri kimi fəaliyyəti kitabda nəzəri və praktiki yanaşmaların vəhdətini yaradır.

Kitabda toxunulan mövzular

Əsərdə kapitalizmin tarixi, qlobal ticarətin formalaşması, bankların pul yaratma mexanizmi, vergi siyasəti, avtomatlaşma və süni intellektin əmək bazarına təsiri, ekoloji problemlər və iqtisadi bərabərsizlik kimi mövzular ətraflı müzakirə edilir.

Müəllif iqtisadi savadlılığın və demokratik institutların inkişafının ölkələrin, xüsusilə də inkişaf etməkdə olan dövlətlərin gələcəyi üçün həlledici olduğunu vurğulayır.

Fərid Mehralızadənin həbsi

Fərid Mehralızadə 2024-cü ilin iyununda “Abzas Media işi” çərçivəsində saxlanılıb. O, həbsinin “Azadlıq Radiosu” üçün fəaliyyətinə görə olduğunu bildirir.

2024-cü il 20 iyunda Bakı Ağır Cinayətlər Məhkəməsinin hökmü ilə “Abzas Media”nın direktoru Ülvi Həsənli, baş redaktor Sevinc Vaqifqızı, jurnalistlər Hafiz Babalı və Fərid Mehralızadə 9 il, Nərgiz Absalamova və Elnarə Qasımova 8 il, koordinator Məhəmməd Kekalov isə 7 il 6 ay azadlıqdan məhrum edilib.