Milli Şuranın Koordinasiya Şurasının üzvü Gültəkin Hacıbəylinin İstanbulda G-82 məhdudiyyət kodu ilə saxlanılması Türkiyə Böyük Millət Məclisində müzakirəyə çıxarılıb.

Bu barədə məsələni DEM Partiyasının Kocaeli millət vəkili Ömər Faruk Gergerlioğlu parlamentin gündəminə gətirib. O, daxili işlər naziri Əli Yerlikayaya ünvanladığı 14 suallıq rəsmi sorğuda Hacıbəylinin saxlanılması, deportasiya prosesi və hüquqi əsaslarla bağlı geniş izahat tələb edib.

Deputatın sorğusunda hansı suallar var?

Gergerlioğlu aşağıdakı məqamların açıqlanmasını istəyib:
• Gültəkin Hacıbəylinin G-82 kodu ilə saxlanılmasının hüquqi əsasları;
• Azərbaycan tərəfindən bu istiqamətdə rəsmən müraciət olunub-olunmaması;
• İnzibati nəzarət qərarının hansı orqan tərəfindən və hansı əsaslarla verilməsi;
• Hacıbəylinin və digər əcnəbilərin hüquqlarına nəzarət mexanizmləri;
• G-82 kodunun necə və nə zaman tətbiq edildiyi;
• Hacıbəylinin Türkiyədə olduğu dövrdə hər hansı cinayət işi və ya ictimai təhlükəsizliklə bağlı prosedurun olub-olmaması;
• “Türkiyəni tərk etməyə dəvət” prosesinin işə salınıb-salınmadığı;
• Deportasiya ediləcəyi halda siyasi motivli həbs və pis rəftar riskləri fonunda “geri göndərməmə” prinsipinə riayət edilib-edilməməsi;
• Son üç ildə Azərbaycan vətəndaşları ilə bağlı G-82 kodu üzrə neçə deportasiya və inzibati nəzarət qərarı verildiyi.

Hadisənin fonu

Gültəkin Hacıbəyli noyabrın 30-da İstanbulda polis tərəfindən saxlanılıb və “milli təhlükəsizlik üçün təhlükə yaradan xaricilər” kateqoriyası ilə G-82 kodu altında nəzarətə götürülüb. Siyasətçi bu addımın siyasi sifariş olduğunu deyir və Azərbaycana geri göndəriləcəyi halda həbs olunacağını bildirir.

Hacıbəylinin saxlanılması, noyabrın 29-da AXCP sədri Əli Kərimli və partiya funksioneri Məmməd İbrahimin həbsləri ilə əlaqələndirilir. Bir gün sonra Milli Şura sədri Cəmil Həsənli də DTX-ya şahid kimi çağırılmışdı.

Hökumətyönlü media bu proseslərin Prezident Administrasiyasının sabiq rəhbəri Ramiz Mehdiyevin cinayət işi ilə bağlı aparıldığını iddia edir.

Siyasətçinin mövqeyi

Gültəkin Hacıbəyli barədə səsləndirilən Ramiz Mehdiyevlə işbirliyi ittihamlarını “tamamilə əsassız və absurd” adlandırır.

Hazırda məsələ ilə bağlı Türkiyə Daxili İşlər Nazirliyinin rəsmi cavabı gözlənilir.