Türkiyə MİT-i məni niyə və hansı əsasla terrorçu hesab edir?

MİT başqanı İbrahim Kalına səslənirəm.

Artıq iki aya yaxındir ki, Türkiyədə Çatalca Geri Göndərmə Mərkəzində qapalı həbsxana şəraitində saxlanılıram. Ötən gün İstanbul İdarə Məhkəməsi barəmdəki deportasiya qərarının dayandırılması ilə bağlı müraciətimə baxaraq şikayətimi təmin etməyib.
Bu gün isə Ankara İdarə Məhkəməsi üzərimə qoyulmuş G-82 kodunun götürülməsi ilə bağlı müraciətim əsasında İstanbul Valiliyinə sorğu göndərilib. Xatırladım ki, G-82 kodu mənim guya hansısa terror təşkilatına üzv olmağım şübhəsinə görə verilib

Buradan Türkiyə MİT başqanı İbrahim Kalına səslənirəm. İbrahim bəy, İstanbul Valiliyi Köç İdarəsi Ankara İdarə Məhkəməsinin sorğusuna verdiyi cavabda göstərib ki, onlar Türkiyə MİT-nin 19.11.2025 tarixli 197899223 saylı yazısına əsasən bu kodu mənim üzərimə qoyublar. Bu koda əsasən mənim Türkiyə dövlətinin təhlükəsizliyi üçün təhlükə yaratdığım bildirilir.

Cənab İbrahim Kalın, mən sizin MİT başqanı olmazdan əvvəl YouTube kanallarındakı irfani mövzularda söhbətlərinizi dinləyərkən ədalətli bir insan olduğunuzu düşünmüşdüm. Budurmu sizin ədalətiniz? Mənim bütün siyasi-ictimai fəaliyyətim göz önündə olub və hər zaman hüquqi və demokratik prinsiplərə uyğun fəaliyyət göstərmişəm. İndi isə sizin rəhbərlik etdiyiniz MİT heç bir əsas və dəlil olmadan, tamamilə uydurma və saxta bir məlumat təqdim edərək məni adı və varlığı bilinməyən, real həyatda olmayan xəyali bir terror təşkilatına üzvlükdə suçlayır.

Mənim bütün siyasi fəaliyyətim boyu Türkiyə və Azərbaycan arasında strateji birliyin daha da möhkəmləndirilməsini, qardaş Türkiyə ilə bağlı xalqımızda sevgi və rəğbətin yaradılmasını təbliğ etmişəm. İndi isə Türkiyənin MİT-i məni Türkiyənin düşmənləri ilə eyniləşdirərək, tamamilə yalan və uydurma əsaslarla məni terrorçu kimi şərləyir. Budurmu mənim Türkiyə sevgimə MİT-n verdiyi cavabı?

Cənab İbrahim Kalın, bilmirəm bu müraciət sizə çatacaq, ya yox, ancaq hər halda MİT kimi hərtərəfli məlumat almaq imkanı olan bir təşkilat yəqin ki, mənim bu müraciətimdən xəbər tutacaq. Mən sizi MİT adından İstanbul Valiliyinə verdiyiniz hüquqa və ədalətə zidd olan əsassız məlumatı geri götürməyə çağırıram. Nəzərə alın ki, MİT-nin haqqımdakı saxta və yalan məlumatı əsasında Ankara İdarə Məhkəməsi üzərimdəki G-82 kodunu saxlayan qərar versə və bu siyasi sifarişli qərar əsasında mən məcburən Azərbaycana həbsə göndərilsəm, bu, Azərbaycan xalqında Türkiyə ilə bağlı dərin məyusluğa və xəyal qırıqlığına səbəb olacaq.

Cənab İbrahim Kalın, siz məndən də daha yaxşı bilirsiniz ki, bu gün Azərbaycanda hər hansı terror təşkilatı və buna bənzər fəaliyyətlər yoxdur. O zaman mən adı və fəaliyyəti olmayan hansı terror təşkilatına üzvlükdə şübhəli biliniriəm? Sizdən ricam, mənim barəmdə bu saxta və uydurma məlumatı hazırlayıb Türkiyə dövlətinin Azərbaycan cəmiyyətindəki nüfuzuna və ədalətinə güvənsizlik yaradanlardan bu hesabatı hansı dəlil və faktlara əsasən hazırladıqlarını soruşmağınızdır.