Yanvarın 16-da Meydan TV ilə bağlı cinayət işi üzrə təqsirləndirilən 12 jurnalistin məhkəməsi davam etdirilib.

Bakı Ağır Cinayətlər Məhkəməsində hakim Aytən Əliyevanın sədrliyi ilə keçirilən prosesdə dövlət ittihamçısı ittiham aktının elanını davam etdirib. Bu zaman təqsirləndirilən jurnalistlərdən Nurlan Qəhrəmanlı (Libre) vəsatət qaldırmaq istədiyini bildirib. Hakim onun vəsatəti səsləndirməsinə icazə verməyərək, dövlət ittihamçısının çıxışının kəsilə bilməyəcəyini deyib.

Nurlan Libre buna etiraz edib və istintaq təcridxanasında zorakılığa məruz qaldığını bildirib. O, əvvəlki məhkəmə iclasından sonra təcridxanada cəzalandırıldığını, qeyri-gigiyenik şəraitdə saxlanıldığını deyib. Jurnalistin sözlərinə görə, başına gələnlərlə bağlı məhkəməyə təqdim etmək üçün yazdığı iki səhifəlik vəsatət vəkillə görüş zamanı əlindən alınıb.

Məhkəmənin vəsatətini dinləmədiyini görən Nurlan Libre zaldakılara bu gündən müddətsiz aclıq aksiyasına başladığını elan edib. O, bunu həm özünə, həm də hazırda həbsdə olan digər jurnalist və media əməkdaşlarına qarşı baş verənlərə etiraz olaraq etdiyini bildirib.

Məhkəmə prosesi yanvarın 30-na qədər təxirə salınıb.