ABŞ-ın paytaxtı Vaşinqtonda yerləşən İsrail səfirliyinin iki əməkdaşı silahlı hücum nəticəsində həyatını itirib. Hadisə mayın 21-i gecə saatlarında Yəhudi Muzeyinin yaxınlığında baş verib.

Məlumata görə, öldürülən şəxslər yaxın günlərdə nişanlanmağa hazırlaşan gənc cütlük olub. Hadisə yerində aparılan araşdırmalardan sonra Çikaqo şəhərindən olan 30 yaşlı bir şəxs şübhəli qismində saxlanılıb. Polis bildirib ki, şübhəli şəxs öz istəyi ilə təslim olub və bu zaman “Azad, azad Fələstin” deyə qışqırıb.

Hadisəyə ABŞ və İsrail rəsmilərindən sərt reaksiyalar gəlib. ABŞ Prezidenti Donald Tramp sosial mediada paylaşım edərək, “Bu açıq-aşkar antisemitizmə əsaslanan, dəhşətli Vaşinqton qətlləri dərhal dayandırılmalıdır! Nifrətə və radikalizmə ABŞ-da yer yoxdur. Qurbanların ailələrinə başsağlığı verirəm,” – deyə bildirib.

İsrail Prezidenti Ayzek Hersoq da “X” platformasında açıqlama verərək, “Bu, ikrah doğuracaq bir nifrət və antisemitizm aktıdır,” – deyə qeyd edib.

Hazırda hadisə ilə bağlı istintaq davam edir. Rəsmi dairələr ictimaiyyəti sakitliyə və hüquqi prosesə hörmətlə yanaşmağa çağırır.