Almaniyanın xarici işlər naziri Yohann Vadeful Avropanın təhlükəsizliyinin yalnız Rusiya ilə qarşıdurma və ona qarşı möhkəm mövqe ilə təmin oluna biləcəyini bildirib.

O, bu fikirləri Almaniya–Polşa forumu çərçivəsində DW-yə verdiyi müsahibədə səsləndirib. Vadefulun sözlərinə görə, Rusiyanın Ukraynaya qarşı başlatdığı müharibə Avropada illərlə mövcud olan “qarşılıqlı anlaşma illüziyalarını” tamamilə dağıdıb.

Nazir Rusiyanı NATO və Avropanın azadlığı üçün “ən böyük təhlükə” adlandıraraq, hazırkı şəraitdə qitənin təhlükəsizliyinin yalnız Moskva ilə ziddiyyət fonunda mümkün olduğunu vurğulayıb.

Vadeful qeyd edib ki, Almaniya NATO müttəfiqlərinin müdafiəsinə sadiqdir və hər hansı hücum halında “bir saniyə belə tərəddüd etmədən” cavab verəcək. O, Almaniyanın Litvada hərbi briqada yerləşdirməsini də bu siyasətin bir hissəsi kimi qiymətləndirib.

Onun sözlərinə görə, Berlin Ukraynaya dəstəyi davam etdirməli və Avropada sabitliyin pozulmasına imkan verilməməlidir. Nazir Rusiyanın sərhədləri dəyişdirməyə yönəlmiş siyasətini qəbulolunmaz adlandıraraq, Avropanın bu cür addımlara qarşı daha sərt mövqe sərgiləməli olduğunu bildirib.

Almaniya və Polşa rəsmiləri birgə bəyanatda Rusiyanın təkcə Ukraynaya qarşı deyil, həm də Avropa ölkələrinə qarşı hibrid hücumlar və dezinformasiya kampaniyaları apardığını qeyd ediblər. Bəyanatda Avropa dəyərlərinin qorunması və Ukraynada ədalətli sülhün təmin olunmasının əsas məqsəd olduğu vurğulanıb.