İran İslam İnqilabı Keşikçiləri Korpusu (SEPAH) Hörmüz boğazının gəmilərin hərəkəti üçün bağlandığını açıqlayıb.

Məlumata görə, qərarın İran və ABŞ arasında əldə olunmuş razılaşmaların yerinə yetirilməməsinə, həmçinin İsrail tərəfindən Livanın cənubunda atəşkəsin pozulmasına cavab olaraq qəbul edildiyi bildirilib.

SEPAH bəyan edib ki, Hörmüz boğazının bağlanması qarşı tərəfin öhdəliklərini yerinə yetirməməsinə verilən ilk cavabdır. Atəşkəs pozuntularının davam edəcəyi təqdirdə əlavə addımların atılacağı qeyd olunub.

Qeyd edək ki, Hörmüz boğazı dünya enerji daşımaları üçün ən mühüm dəniz marşrutlarından biri hesab olunur. Bu ərazidən hər gün böyük həcmdə neft və qaz daşınır.

ABŞ və İran arasında nüvə proqramı ilə bağlı danışıqlarda nəticə əldə olunmaması fonunda bölgədə gərginlik artmışdı. Daha əvvəl ABŞ və İsrailin İrana qarşı hava zərbələri endirdiyi, İranın isə cavab olaraq İsrail və ABŞ obyektlərini raket və pilotsuz uçuş aparatları ilə hədəf aldığı bildirilmişdi. Sonradan tərəflər arasında atəşkəs razılaşması əldə olunmuşdu.