İyulun 24-də Bakı Ağır Cinayətlər Məhkəməsində fəal Məhəddin Orucovun işi üzrə hazırlıq iclası başlayıb.


Jurnalistlər və vətəndaş cəmiyyəti nümayəndələri prosesə buraxılmayıb.

M.Orucov məhkəməyə əlləri arxadan qandallı gətirilib.

Fəalın yaxınlarının verdiyi məlumata görə, onun vəkili Nazim Musayev Orucovun qandallarının çıxarılmasını tələb edib. Mühafizəçilər qandalları çıxarsalar da, ön tərəfdən taxıblar.

Vəkil qandalların tamamilə çıxarılmasını istəyib. Lakin prosesə sədrlik edən hakim Rasim Sadıqov bildirib ki, bu məsələ Penitensiar xidmətin səlahiyyətlərinə aiddir. Bu cavab olaraq vəkil qeyd edib ki, iclasda qərarlar hakimlər tərəfindən verilir.

Bundan əlavə, təqsirləndirilən şəxslərin məhkəmədə qandallı saxlanması Avropa İnsan Hüquqları Məhkəməsinin presedent qərarlarında işgəncə kimi qiymətləndirilir.

Daha sonra məlum oldu ki, ittiham aktı nə təqsirləndirilən şəxsə, nə də vəkilə baxılması üçün verilməyib.

Musayev bunu təqsirləndirilən şəxsin müdafiə hüququnun pozulması kimi qiymətləndirib.

Bununla əlaqədar hakim iclasın iyulun 30-na təxirə salınmasına qərar verib.

Turan-ın müxbiri ilə söhbətində vəkil Musayev qeyd edib ki, media nümayəndələrinin və digər şəxslərin prosesə buraxılmaması məhkəmənin açıqlıq və aşkarlıq prinsipini pozur.

O, həmçinin bildirib ki, təqsirləndirilən şəxslərin məhkəmədə əli qandallı saxlanılması qərarı qanunsuzdur.

Müdafiə tərəfi Orucovun cinayət təqibini əsassız hesab edir və ona bəraət qazandırılmasını istəyəcək.

Qeyd edək ki, Orucov 2023-cü il dekabrın 13-də külli miqdarda narkotik vasitələrin qanunsuz dövriyyəsi (Azərbaycan Cinayət Məcəlləsinin 234.4.3-cü maddəsi) ittihamı ilə həbs edilib.

Bundan əvvəl, 2023-cü ilin oktyabrında o, polisə tabe olmamaq ittihamı ilə 30 sutka inzibati qaydada həbs edilmişdi.

Orucov azadlığa çıxandan sonra həbsinin əsl səbəbinin sosial şəbəkələrdə hakimiyyətin tənqidi olduğunu bildirmişdi.

O, həmçinin döyülmə və polisin qeyri-insani rəftarından da şikayət edib.