Meydan TV-nin həbsdə olan əməkdaşlarından Aynur Qənbərova (Elgünəş) və Natiq Cavadlının istintaq dövründə ev dustaqlığına buraxılması üçün vəkilləri vəsatət verib.

Hər iki jurnalistlə bağlı vəsatətə yanvarın 17-də Xətai Rayon Məhkəməsində baxılıb.

Natiq Cavadlının sözlərinə görə, hazırda məhz jurnalist fəaliyyətinə görə həbsdə saxlanılır:

"Mən heç bir cinayət törətməmişəm. Əksinə, peşəkar jurnalist fəaliyyətimə görə mükafata layiq görülmüşəm. Mənim işim xəbər yazmaq, müsahibə almaq idi. Hətta İlham Əliyev vaxtilə deputat olanda ondan da müsahibə almışam".

Aynur Elgünəş də məhkəməsində ona və digər "Meydan TV " əməkdaşlarına verilmiş qaçaqmalçılıq ittihamının saxta olduğunu deyib.

O bildirib ki, özünün və digər həmkarlarının həbsinin əsl səbəbi Meydan TV-nin korrupsiyanı ifşa edən araşdırmaları, tənqidi materiallarıdır.

Onları həbs eləməkdə məqsəd təcrid edib susdurmaqdır.

"Jurnalistika cinayət deyil!", – Aynur Elgünəş belə deyib.

Həbsinin Prezident səviyyəsində verilmiş siyasi sifariş olduğunu vurğulayan jurnalist hakim Sülhanə Hacıyevaya deyib ki, bu işdə qərar vermək üçün o, heç kimdir:

"Belə işlərdə siz heç kimsiniz, heç bir səlahiyyətiniz yoxdur, nə göstəriş verirlər, onu da gəlib oxuyursunuz".

Aynur Elgünəş və Natiq Cavadlının ev dustaqlığına buraxılması ilə bağlı vəsatətlər təmin olunmayıb.