Avropa İnsan Haqları Məhkəməsi (AİHM) Gürcüstanda həbsdə olan azərbaycanlı jurnalist Əfqan Sadıqovun Azərbaycana ekstradisiyasını qadağan edib.

Buna baxmayaraq, Gürcüstan məhkəmələri jurnalisti həbsdə saxlamağa davam edir.

Bu barədə Sadıqovun hüquqlarını müdafiə edən, Tbilisi mərkəzli Sosial Ədalət Mərkəzi açıqlama yayıb.

Açıqlamada bildirilir ki, Mərkəz AİHM-in 27 fevral qərarına əsaslanaraq martın 11-də Tbilisi Şəhər Məhkəməsinə jurnalistin azadlığa buraxılması üçün müraciət edib. Lakin məhkəmə heç bir dinləmə keçirmədən vəsatəti “qəbuledilməz” elan edib.

Hakim qərarını belə əsaslandırıb ki, müdafiə tərəfi Sadıqovun həbs qətimkan tədbirinin ləğvi üçün əsas olacaq yeni, əhəmiyyətli arqument təqdim edə bilməyib.

Məhkəmənin fikrincə, Avropa Məhkəməsinin Sadıqov haqqında müvəqqəti tədbirin tətbiqi ilə bağlı qərarı ekstradisiyanı müvəqqəti dayandırmaq məqsədi daşıyır, lakin onu qadağan etmir.

Mərkəz əlavə edir ki, məhkəmənin bu qərarı martın 17-də Tbilisi Apelyasiya Məhkəməsi tərəfindən də dəstəklənib.

Mərkəz bildirir ki, əgər “ekstradisiya məqsədi məhkəməyəqədər həbs müddəti bitənə qədər praktiki olaraq yerinə yetirilə bilmirsə və buna görə də artıq mövcud deyilsə, ekstradisiyanın təmin edilməsi mexanizmi kimi həbs qətimkan tədbirindən istifadə/saxlamaq zərurəti” də yoxdur.

Mərkəz məhkəmələrin qərarını “tamamilə əsassız və həm milli qanunvericiliyin, həm də beynəlxalq hüququn tələblərinə zidd” adlandırıb.

“Azel TV” YouTube kanalının rəhbəri olan Əfqan Sadıqov ötən il avqustun 3-də Tbilisidə həbs edilib. Gürcüstan tərəfinin məlumatına görə, Sadıqov hədə-qorxu ilə pul tələb etmə ilə bağlı cinayətlərə görə Azərbaycan tərəfindən axtarışa verilib. Ailəsi, hüquq müdafiə təşkilatları və müstəqil media onun həbsini siyasi təqibi ilə əlaqələndirir.

AİHM Sadıqovun ekstradisiya edilməməsi barədə ilk qərarını yanvarın 14-də verib və Gürcüstan hökumətindən qərardan sonrakı 1 həftə ərzində Sadıqovu Azərbaycana ekstradisiya etməməyi tələb edib. Fevralın 27-də isə AİHM qərarın iş mahiyyəti üzrə baxılana qədər qüvvədə qalması qərarını çıxarıb.