USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Azərbaycanlı doktorant Fazil Qasımov 10 gündür həbsdə aclıq aksiyası keçirir
İstanbul Universitetinin azərbaycanlı doktorantı Fazil Qasımovun artıq 10 gündür həbsdə aclıq aksiyası keçirdiyi bildirilir. Bu barədə AzadlıqRadiosuna məlumat verən yaxınları onun qanunsuz həbsə, şikayətlərinə cavab verilməməsinə etiraz olaraq aclığa başladığını bildiriblər.
Məlumata görə, Qasımov hazırda Bakının Qaradağ rayonu, Umbakı qəsəbəsində yerləşən penitensiar müəssisədə saxlanılır və mayın 10-dan aclıq aksiyasına başlayıb. Yaxınlarının sözlərinə görə, o, barəsindəki hökmün heç bir əsaslı sübuta söykənmədiyini, özünün təqdim etdiyi sübutların isə məhkəmə tərəfindən nəzərə alınmadığını bildirir: “Heç bir cinayət törətmədiyi halda, Bakı Ağır Cinayətlər Məhkəməsi onu saxta valyuta ittihamı ilə 9 il azadlıqdan məhrum etdi. Halbuki Fazil təqsirsiz olduğunu göstərən sübutlar təqdim etdi, amma bunlar heç sayıldı”, – deyə yaxınları qeyd edib.
Qasımovun vəkili Nemət Kərimli də AzadlıqRadiosuna açıqlamasında müvəkkilinin mayın 10-dan aclığa başladığını təsdiqləyib.
Xatırladaq ki, Fazil Qasımov iqtisadçı Qubad İbadoğlunun həbsi ilə əlaqəli aparılan istintaq çərçivəsində, 2023-cü ilin avqustunda İstanbulda saxlanılaraq Azərbaycana gətirilib. Hazırda onun işinə Bakı Apellyasiya Məhkəməsində baxılır.
