ABŞ Konqresinin üzvü Ceyms Makqovern Azərbaycan Prezidenti İlham Əliyevə məktub ünvanlayaraq “Abzas Media işi” çərçivəsində həbsdə olan jurnalist Fərid Mehralızadənin dərhal və qeyd-şərtsiz azad olunmasını tələb edib. Bu barədə “Azadlıq Radiosu” məlumat yayıb.

Konqresmen məktubunda vurğulayıb ki, mayın 30-da Mehralızadənin “haqsız həbsinin” bir ili tamam olur. O qeyd edib ki, bu müddət ərzində jurnalistin qızı dünyaya gəlib, lakin o, övladını cəmi bir dəfə görə bilib.

“Onun hələ də həbsdə qalması ciddi narahatlıq doğurur. Fəridin həyat yoldaşı və qızı ilə birləşməsi üçün dərhal azad olunmasına çağırıram”, – deyə Makqovern bildirib.

Konqresmenin sözlərinə görə, istintaq Mehralızadənin “Abzas Media” ilə əlaqəsinə dair hər hansı sübut təqdim etməyib. Məktubda həmçinin jurnalistin həbsdə zorakılığa və məhkəmə proseslərində aşağılayıcı münasibətə məruz qaldığı da qeyd olunub.

Makqovern bildirib ki, fevralın 11-də Mehralızadə və digər təqsirləndirilən şəxslər məhkəməyə qatılmaqdan imtina ediblər, çünki pis rəftarla bağlı şikayətləri araşdırılmayıb. Etiraza cavab olaraq isə jurnalist məhkəmə zalına zorla gətirilib. Konqresmen bu addımı da həbsdə qeyri-insani rəftarın bir forması kimi qiymətləndirib.

Makqovern məktubunun sonunda ümid etdiyini bildirib ki, Azərbaycan beynəlxalq ədalətli məhkəmə standartlarına əməl edəcək, Fərid Mehralızadəyə qarşı əsassız ittihamlar ləğv olunacaq və o, dərhal azadlığa buraxılacaq.

“Abzas Media işi” üzrə Fərid Mehralızadə ilə yanaşı, media qurumunun təsisçisi Ülvi Həsənli, koordinatoru Məhəmməd Kekalov, baş redaktor Sevinc Vaqifqızı, araşdırmaçı jurnalist Hafiz Babalı, jurnalistlər Nərgiz Absalamova və Elnarə Qasımova da mühakimə olunur. Onlara qarşı, o cümlədən qaçaqmalçılıq maddəsi ilə ittihamlar irəli sürülüb. Jurnalistlər isə fəaliyyətlərinin və korrupsiya araşdırmalarının cəza hədəfinə çevrildiyini bildirirlər.