USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Əli Kərimlinin Daha Bir Mühafizəçisi və Sürücüsü Həbs Olundu
Azərbaycan Xalq Cəbhəsi Partiyasının (AXCP) sədri Əli Kərimlinin ictimai əsaslarla mühafizəçisi işləyən Novruz Tağıyev barəsində cinayət işi başlanıb və o, həbs olunaraq Kürdəxanı təcridxanasına göndərilib. Bu barədə Əli Kərimli mayın 21-də “Facebook” hesabında məlumat yayıb.
Partiya sədrinin sözlərinə görə, Tağıyev Azərbaycan Respublikası Cinayət Məcəlləsinin dələduzluq maddəsi ilə ittiham olunur. Kərimli bildirib ki, Novruz Tağıyev əqidəli və dürüst cəbhəçi olub, ev alqı-satqısı sahəsində vasitəçilik edərək ailəsini dolandırıb. O, həbsin siyasi sifarişli olduğunu qeyd edib: “Yalnız mənim yanımda olduğu üçün şərlənərək həbs edilib”.
Bundan əlavə, AXCP sədri ilə ictimai əsaslarla sürücülük edən Rəşad Əliyev də 25 sutka inzibati qaydada həbs olunub. Son aylar ərzində partiya sədrinin digər yaxın əməkdaşları da hədəfə alınıb. Aprelin 1-də sürücüsü Zaur Rzalı, mayın 5-də isə tədbirlərə maşınla müşayiət edən Asam Əli və mühafizəçi Kənan İsmayıl da 30 sutka inzibati həbsə məruz qalıblar.
Əli Kərimlinin digər mühafizəçilərindən biri – Niyaməddin Əhmədov isə daha əvvəl “terrorizmi maliyyələşdirmə” ittihamı ilə 13 il azadlıqdan məhrum edilib. Mühafizəçilərindən Kənan Basqal isə mart ayında bıçaqlama ittihamı ilə həbs olunub. Həbs edilən şəxslər irəli sürülən ittihamları qəbul etmirlər.
Partiyanın açıqlamasına görə, hazırda AXCP-nin təxminən 15 fəalı uzunmüddətli həbsdə saxlanılır.
Əli Kərimli hesab edir ki, hakimiyyətin bu addımları siyasi rəqabətə dözümsüz yanaşmasının göstəricisidir: “İlham Əliyev öz siyasi rəqibləri ilə yalnız belə üsullarla ‘yarışır’. Demokratik dünyada liderlər rəqibləri ilə azad seçkilərdə yarışır, xalqın səsinə güvənirlər. Hakimiyyətdə qalmaq üçün repressiyalara əl atmırlar”.
Rəsmi qurumlar hələlik bu həbslərlə bağlı açıqlama verməyiblər.
