İqtisadçı Fazil Qasımovun ailəsinin verdiyi məlumata görə, o, mayın 19-da Umbakı qəsəbəsində yerləşən cərimə kamerasına – antisanitar şəraitdə olan karserə salınıb. Qasımov bu barədə mayın 22-də Bakı Apellyasiya Məhkəməsində keçirilən ilkin baxış iclasında məlumat verib. Onun sözlərinə görə, məhz bu açıqlamasına görə həmin gün anası ilə görüşünə icazə verilməyib.

Ailə üzvləri bildirirlər ki, Fazil Qasımov artıq 14 gündür aclıq aksiyası keçirir. Bu, onun ikinci aclıq aksiyasıdır. O, bu yolla öz həbsinə və irəli sürülən ittihamlara etiraz edir. İqtisadçı aclığa mayın 10-dan başlayıb.

Qasımovun vəkili Nemət Kərimli bildirib ki, ilkin baxış iclasında məhkəmə heyətinə etiraz təqdim edilsə də, bu vəsatət təmin edilməyib. Vəkil həmçinin bəzi istintaq hərəkətlərinin aparılmasını tələb edib. Onun sözlərinə görə, Qubad İbadoğlu bu iş üzrə hələ dindirilməyib və əsas sübutlardan biri – Anar Əliyevə pul verildiyi iddia edilən kamera görüntüləri ayrı saxlanılan iş materiallarında qalıb. Vəkil qeyd edib ki, bu görüntülər araşdırılmalı, həmçinin əməliyyat-axtarış fəaliyyəti barədə qeydiyyat jurnalı da Bakı Şəhər Baş Polis İdarəsindən alınmalıdır. Lakin məhkəmə bu tələbləri də təmin etməyib.

Məhkəmə baxışı üzrə növbəti iclas 2025-ci il iyunun 4-nə təyin olunub.

Fazil Qasımov 2023-cü ildə Türkiyədə saxlanılaraq Azərbaycana gətirilib və 2025-ci il martın 13-də 9 il azadlıqdan məhrum edilib. O, Cinayət Məcəlləsinin saxta pul və valyuta ilə bağlı ittihamı üzrə – mütəşəkkil dəstə ilə törədilmə maddəsi ilə ittiham olunub. Lakin iqtisadçı özünü təqsirli bilmir və ittihamları qondarma hesab edir.

Qeyd edək ki, Qubad İbadoğlu da eyni iş üzrə 2023-cü ilin iyulunda həbs olunmuş, lakin 2024-cü ilin aprelində ev dustaqlığına buraxılmışdı. O da özünə qarşı irəli sürülən ittihamları rədd edir.