“Meydan TV işi” çərçivəsində həbs olunan jurnalist Natiq Cavadlının apellyasiya şikayəti təmin edilməyib. Bu barədə onun vəkili Zibeydə Sadıqova məlumat verib.

İyulun 3-də Bakı Apellyasiya Məhkəməsində hakim Zamin İbrahimovun sədrliyi ilə keçirilən iclasda jurnalistin ev dustaqlığına buraxılması ilə bağlı verilmiş şikayət rədd edilib. Məhkəmə əvvəlki instansiya — Xətai Rayon Məhkəməsinin qərarını qüvvədə saxlayıb. Beləliklə, Natiq Cavadlı barəsində seçilmiş həbs-qətimkan tədbiri qüvvədə qalıb.

Vəkil bildirib ki, Cavadlının üç azyaşlı övladı var və o, həmçinin ağır xəstə olan anasına baxır. Müdafiə tərəfi hesab edir ki, jurnalistin istintaqdan yayına biləcəyi ilə bağlı əsaslı şübhə yoxdur və onun həbsdə saxlanması zəruri deyil.

“Şikayətimiz təmin olunmadı. İndi Avropa İnsan Hüquqları Məhkəməsinə müraciət edəcəyik,” – deyə Zibeydə Sadıqova bildirib.

Natiq Cavadlı ötən ilin dekabrında daha bir neçə jurnalistlə birlikdə saxlanılıb. Onlar Cinayət Məcəlləsinin 206.3.2-ci maddəsi (qaçaqmalçılıq – qabaqcadan əlbir olan bir qrup şəxs tərəfindən törədildikdə) ilə ittiham olunurlar. Jurnalistlər ittihamları qəbul etmir və həbslərinin peşə fəaliyyətləri ilə əlaqəli olduğunu bildirirlər.

Eyni iş üzrə saxlanılan digər jurnalistlərin – Aytac Tapdıq, Aynur Elgünəş, Fatimə Mövlamlı, Xəyalə Ağayeva, Aysel Umudova və digərlərinin də apellyasiya şikayətləri daha əvvəl təmin olunmamışdı.

Hazırda Natiq Cavadlının vəkili və yaxınları onun azadlığa buraxılması üçün beynəlxalq hüquqi vasitələrdən istifadə etməyə hazırlaşırlar.

Beynəlxalq təşkilatlar və yerli hüquq müdafiəçiləri jurnalistlərin həbslərini ifadə azadlığına və mediaya qarşı yönəlmiş təzyiq kimi qiymətləndirirlər. Azərbaycan hakimiyyəti isə bu iddiaları rədd edir və istintaqın qanun çərçivəsində aparıldığını bildirir.