Bu gün, 4 iyul tarixində keçirilən Milli Məclisin iclasında deputat Aqil Abbas Azərbaycanda polis əməkdaşlarının sosial rifahı məsələsini gündəmə gətirib. Deputat ölkənin təhlükəsizliyində Azərbaycan polisinin xüsusi rolunu vurğulayaraq onların sosial təminatının artırılmasının vacibliyini bildirib.

“Postsovet məkanında Azərbaycan polisi ölkənin təhlükəsizliyinin təmin olunmasında xüsusi rol oynayır. Biz gecələr rahat yatırıqsa, bu, bizi qoruyan polislərin sayəsindədir. Polisin gecəsi-gündüzü yoxdur. Ancaq ən aşağı maaş da onlara verilir”, – deyə Aqil Abbas çıxışında bildirib.

Deputat həmçinin Birinci və İkinci Qarabağ müharibəsində polis əməkdaşlarının göstərdiyi qəhrəmanlıqlara diqqət çəkib:
“62 polis əməkdaşına Milli Qəhrəman adı verilib. Bu, polisin vətən qarşısında göstərdiyi fədakarlığın bariz nümunəsidir.”

O, polislərin maaşlarının artırılmasını təklif edərək bildirib ki, sosial şəraitin yaxşılaşdırılması onların həm həyat keyfiyyətinə, həm də xidmətdə motivasiyasına birbaşa təsir göstərir.

Aqil Abbasın şəxsi bağlantısı

Qeyd edək ki, deputat Aqil Abbasın oğlu Tuncay Abbas uzun müddət Daxili İşlər Nazirliyində xidmət edib. O, Binəqədi Rayon Polis İdarəsinin 5-ci Polis Bölməsinin rəisi vəzifəsində çalışıb. 2024-cü ildə DİN-dən ayrılan Tuncay Abbas hazırda Dövlət Sərhəd Xidmətində fəaliyyət göstərir.

Deputatın bu çıxışı sosial şəbəkələrdə birmənalı qarşılanmayıb. Bəzi istifadəçilər onun təklifini dəstəkləsə də, digərləri şəxsi maraqların müdafiəsi ehtimalını da istisna etmirlər. Bununla belə, mütəxəssislər polis əməkdaşlarının sosial təminatının artırılmasının vacibliyini ümumən təsdiqləyir, xüsusilə də ölkədə təhlükəsizlik xidmətlərinin artan yükü fonunda bu məsələ yenidən gündəmə gəlib.