“Toplum TV işi” üzrə mühakimə olunan ictimai fəal məhkəmədə hədəfə alınma tarixçəsini danışdı

İyulun 7-də Bakı Ağır Cinayətlər Məhkəməsində “Toplum TV işi” üzrə keçirilən məhkəmə prosesində təqsirləndirilən şəxs qismində iştirak edən III Respublika Platformasının spikeri və Demokratik Təşəbbüslər İnstitutunun (İDİ) rəhbəri Akif Qurbanov çıxış edib. O, məhkəmədə ifadə verərək illərdir davam edən təzyiqlər və izləmələr barədə danışıb.

Qurbanov bildirib ki, hədəfə alınmasının əsası 2013-cü il prezident seçkilərində qoyulub. Həmin dövrdə o, Mərkəzi Seçki Komissiyasının üzvü kimi seçki nəticələrini təsdiqləyən protokolu imzalamaqdan imtina edib və bununla bağlı xüsusi rəyini ictimaiyyətlə bölüşüb.

“Qanunla bu rəy protokola əlavə olunmalı idi. Amma bilirdim ki, əlavə edilməyəcək. Mən də həm ictimaiyyətlə paylaşdım, həm də Konstitusiya Məhkəməsinə göndərdim. Bunun MSK-dakı fəaliyyətimin sonu olacağını bilirdim. Amma mənim üçün vicdanımın səsinə sadiq qalmaq daha vacib idi,” – deyə Akif Qurbanov bildirib.

DTX-nın təklifi və Qurbanovun cavabı

İctimai fəal məhkəmədə çıxışı zamanı əlavə edib ki, 2017-ci ildə Dövlət Təhlükəsizliyi Xidmətinin əməkdaşı onunla qeyri-rəsmi görüş istəyib. Görüş zamanı ona İDİ-nin Prezident Administrasiyası tərəfindən izlənildiyi, həmçinin birgə əməkdaşlıq təklifi verildiyi deyilib.

Qurbanov bu təklifi rədd etdiyini və hakimiyyətə açıq şəkildə etirazını ifadə etdiyini deyib:

“Mən dedim ki, dövlətimi sevirəm, amma sizin təmsil etdiyiniz rejimlə dövlət arasında bərabərlik işarəsi qoya bilmərəm. Biz hüquqa və institusiyalara əsaslanan dövlət anlayışını müdafiə edirik. Dövlət bir ailənin mülkiyyəti ola bilməz.”

Onun bu çıxışı zalda iştirak edən vəkillər və müşahidəçilər tərəfindən diqqətlə izlənilib. Qurbanov qeyd edib ki, fəaliyyətini daim qanun çərçivəsində qurub və baş verənlər yalnız ictimai-siyasi mövqeyinə görə həyata keçirilən təzyiqlərin davamıdır.

Xatırlatma: “Toplum TV işi”

Qeyd edək ki, Akif Qurbanov və bir neçə jurnalist, ictimai fəal “Toplum TV işi” çərçivəsində qaçaqmalçılıq ittihamı ilə həbs olunub. Onlar ittihamları qəbul etmir və cinayət işinin ictimai və jurnalist fəaliyyətlərinə görə qurulduğunu bildirirlər.

Beynəlxalq hüquq müdafiə təşkilatları və Avropa qurumları bu həbsləri siyasi motivli hesab edir və Azərbaycan hökumətini ictimai fəallara qarşı təqiblərə son qoymağa çağırır.