“Seçki Müşahidə Alyansı”nın rəhbəri Məmməd Alpay (Məmmədzadə) və Vətəndaş Hüquqları İnstitutunun rəhbəri Bəşir Süleymanlının barəsində seçilmiş həbs qətimkan tədbiri uzadılıb.

APA-nın məlumatına görə, iyulun 9-da Binəqədi Rayon Məhkəməsində hər iki şəxs üzrə keçirilən ayrı-ayrı məhkəmə iclaslarında istintaq orqanının təqdimatlarına baxılıb. Məhkəmə təqdimatları təmin edərək, hər iki şəxs barəsində qüvvədə olan həbs qətimkan tədbirinin müddətini daha 3 ay uzadıb.

Qeyd edək ki, Bəşir Süleymanlı və Məmməd Alpay bu iş üzrə 2024-cü il martın 14-də həbs olunublar.

Eyni cinayət işi üzrə digər ictimai fəallar da məsuliyyətə cəlb olunublar. ABŞ-nin German Marşal Fondunun (GMF) Azərbaycan üzrə məsləhətçisi Mehriban Rəhimli barəsində cinayət işi başlanıb və o, istintaq dövründə polis nəzarətinə verilib.

“Hüquq və İnkişaf” İctimai Birliyinin rəhbəri Hafiz Həsənov təqsirləndirilən şəxs kimi tanınıb və onun barəsində ev dustaqlığı qətimkan tədbiri seçilib.

Sosial Hüquqlar Mərkəzinin rəhbəri Sübhan Həsənli isə hazırda ölkə xaricindədir. O, qiyabi olaraq həbs olunub və barəsində axtarış elan edilib.