İyulun 14-də Bakı Ağır Cinayətlər Məhkəməsində “Toplum TV işi” üzrə həbs olunan şəxslərin növbəti məhkəmə prosesi baş tutacaq. Məhkəmə iclası saat 10:00-a təyin edilib.

Ötən proses zamanı təqsirləndirilən şəxslərdən biri, Demokratik Təşəbbüslər İnstitutunun (İDİ) rəhbəri və III Respublika Platformasının spikeri Akif Qurbanov əvvəlki iclasdakı müdafiə çıxışına davam edib. O, çıxışında ittihamların əsassız olduğunu bildirib və siyasi motivli təqibə məruz qaldıqlarını vurğulayıb.

Toplum TV əməkdaşı Fərid İsmayılov isə iclasda bir neçə vəsatət qaldırıb. Onlardan biri hökumətyönlü mediada haqqında yayımlanan və istintaq sirri sayılmalı məlumatlarla bağlı olub. İsmayılov məhkəmədən bu yazıların araşdırılmasını istəyib. Hakim ondan növbəti iclasa həmin yazıların ekran görüntülərini (“skrinşotlarını”) təqdim etməsini tələb edib.

Əməliyyat və istintaq prosesi

2024-cü il martın 6-da, hüquq-mühafizə orqanları “Toplum TV”nin ofisində əməliyyat keçirib və qapısını möhürləyib. Elə həmin gün bir sıra jurnalist və ictimai fəallar saxlanılıb. Ümumilikdə, 10 nəfər barəsində cinayət işi açılıb.

Hazırda həbsdə olan şəxslər bunlardır:
• Ələsgər Məmmədli – “Toplum TV”nin həmtəsisçisi
• Müşfiq Cabbar – jurnalist
• Fərid İsmayılov – jurnalist
• Akif Qurbanov – İDİ rəhbəri, III Respublika Platforması spikeri
• Ruslan İzzətli – III Respublika Platforması qurucu heyət üzvü
• Əli Zeynal, Ramil Babayev, İlkin Əmrahov – Demokratik Təşəbbüslər İnstitutunun əməkdaşları

Digər iki nəfər barəsində qətimkan tədbirləri fərqli olub:
• Elmir Abbasov – jurnalist, polis nəzarətinə verilib
• Şahnaz Bəylərqızı – Toplum TV redaktoru əvvəlcə ev dustaqlığına, daha sonra polis nəzarətinə buraxılıb

İttihamlar və mövqelər

İstintaqın əvvəlində saxlanılanlara qarşı qaçaqmalçılıq ittihamı irəli sürülmüşdü. Lakin sonradan cinayət işi ağırlaşdırılıb. Hazırda onlara qarşı daha ciddi maddələrlə ittihamlar irəli sürülüb. Təqsirləndirilən şəxslər isə bu ittihamları rədd edir, onların siyasi sifarişlə həbs olunduqlarını bildirirlər.

Beynəlxalq insan haqları təşkilatları və yerli hüquq müdafiəçiləri “Toplum TV işi”ni medianın və vətəndaş cəmiyyətinin susdurulması cəhdi kimi qiymətləndirirlər.

Prosesin gedişi və çıxışlar ilə bağlı foto.info.az sizi məlumatlandırmağa davam edəcək.