Bakının 28 May küçəsində yerləşən və dövlət tərəfindən qorunan memarlıq abidəsinin fasadına əlavə olunan metal konstruksiyalar Bakı Şəhər Memarlıq və Şəhərsalma Baş İdarəsinin müdaxiləsi ilə sökülür.

Dövlət Şəhərsalma və Arxitektura Komitəsinin verdiyi məlumata görə, bina Nazirlər Kabinetinin qərarı ilə dövlət mühafizəsinə alınmış memarlıq abidələrindən biridir. Məlumata əsasən, Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin mütəxəssisləri də prosesi izləyir və tarixi görkəmin bərpası istiqamətində tədbirlər həyata keçirilir.

İdarənin açıqlamasında bildirilib ki, sökülən konstruksiyalar həmin ünvanda fəaliyyətə başlaması planlaşdırılan restorana məxsusdur. İddialara görə, restoran mərhum gənclər və idman naziri Azad Rəhimova məxsus olmuş binada açılmalı idi və hazırda onun ailəsi biznes fəaliyyətini genişləndirməyə hazırlaşırdı.

Xatırladaq ki, memarlar Sadıq Dadaşov və Mikayıl Hüseynovun layihələndirdiyi bu binada hazırda “Xalq qəzeti” redaksiyası yerləşir.

İdarə qanunsuz müdaxilələrin qarşısının alınması və abidənin ilkin görünüşünün qorunması üçün tədbirlərin davam etdiriləcəyini bildirib.