“Meydan TV işi” üzrə həbsdə saxlanılan jurnalist, “Arqument.az” saytının baş redaktoru Şəmşad Ağayev (Ağa) səhhətində yaranan problemlərə görə Penitensiar Xidmətin Müalicə Müəssisəsinə yerləşdirilib.

Bu barədə onun ailəsi “Meydan TV”yə məlumat verib. Bildirilir ki, jurnalist mədə-bağırsaq xəstəliklərindən, xüsusilə də mədə xorasından əziyyət çəkir.

Şəmşad Ağayev bu ilin fevralın 5-də saxlanılıb. Ona əvvəlcə Cinayət Məcəlləsinin 206.3.2-ci maddəsi (qabaqcadan əlbir olan qrup tərəfindən qaçaqmalçılıq) ilə ittiham irəli sürülmüşdü. Avqust ayında ittihamlar daha da ağırlaşdırılaraq qanunsuz sahibkarlıq, çirkli pulların yuyulması, qaçaqmalçılıq, vergidən yayınma və sənəd saxtalaşdırma maddələri əlavə olunub.

Sentyabrın 16-da məhkəmə qərarı ilə onun həbs müddəti daha 3 ay uzadılıb.

Jurnalist isə bütün ittihamları rədd edir və həbsi siyasi sifariş, peşə fəaliyyətinə görə təzyiq kimi qiymətləndirir.