Benində hərbçilər hakimiyyəti ələ keçirərək Prezident Patris Talonu devirdiklərini elan ediblər. Bu barədə ölkənin “La Nouvell Tribune” portalı məlumat yayıb.

Məlumata görə, hərbi qüvvələr ilk olaraq dövlətin milli televiziyasının binasını nəzarətə götürüblər. Televiziya vasitəsilə yayımlanan bəyanatda hərbçilər ölkə konstitusiyasının fəaliyyətinin dayandırıldığını, bütün siyasi partiyaların fəaliyyətinə qadağa qoyulduğunu bildiriblər. Bundan əlavə, Beninin bütün sərhədlərinin bağlandığı açıqlanıb.

Hərbçilər ölkədə təhlükəsizliyin və idarəçiliyin silahlı qüvvələrin nəzarətinə keçdiyini vurğulayıblar. Hazırda paytaxt Porto-Novoda vəziyyətin gərgin olduğu, bəzi dövlət qurumlarında hərbi nəzarətin tətbiq edildiyi bildirilir.

Benin haqqında qısa məlumat

Coğrafiya və tarix:
Müasir Beninin şimalında qədim qurma tayfaları yaşayırdı. Daha sonra bu ərazilərə Nigeriya istiqamətindən gələn barba tayfaları köç etmişdi. Cənub hissədə isə fon və aca tayfaları üstünlük təşkil edirdi. XV əsrdə portuqaliyalıların bölgəyə gəlməsi ilə ərazi Avropa müstəmləkə maraqlarının bir hissəsinə çevrildi.
Benin 1893-cü ildən Fransanın müstəmləkəsi oldu və 1904-cü ildə Fransız Daqomeyası adı altında Fransız Qərbi Afrikasına daxil edildi. 1 avqust 1960-cı ildə isə Daqomeya Respublikası müstəqilliyini elan etdi. Daha sonra ölkə Benin adını aldı.

Əhali:
2013-cü il siyahıyaalınmasına görə Beninin əhalisi 9 983 884 nəfərdir. Orta illik artım 2,9 faizdir. Orta ömür müddəti 59 ildir. Ölkədə HİV yayılma göstəricisi 1,2 faiz təşkil edir.

Etnik tərkib:
Benin çoxmillətli ölkədir. Burada 60-dan çox xalq yaşayır. Əhalinin təxminən 65 faizini fon etnik qrupuna aid olan şərq eve xalqları təşkil edir. Bundan başqa, daqomey, yoruba, somba, barba və digər qruplar da geniş yayılıb.

Dil:
Rəsmi dövlət dili fransız dilidir. Cənubda fon və yoruba dilləri, şimalda isə müxtəlif tayfa dilləri geniş istifadə olunur.

Din:
Əhalinin 42,8 faizi xristian, 24,4 faizi müsəlman, 17,3 faizi buddist, 15,5 faizi isə digər dinlərin nümayəndələridir. Savadlılıq səviyyəsi aşağıdır – 15 yaşdan yuxarı əhalinin yalnız 34,7 faizi savadlıdır.

Hazırda Benində baş verən çevrilişlə bağlı əlavə məlumatlar gözlənilir.