Bu gün Azərbaycan xalqı öz tarixinin ən şərəfli günlərindən biri – Müstəqillik Gününü qeyd edir. 1918-ci il mayın 28-də müsəlman Şərqində ilk parlamentli və demokratik respublika olan Azərbaycan Xalq Cümhuriyyəti yaradılıb. Bu tarixi hadisədən 108 il ötür.

Azərbaycan Xalq Cümhuriyyəti xalqımızın dövlətçilik tarixində mühüm mərhələ olmaqla yanaşı, bütün türk və İslam dünyası üçün də böyük siyasi və tarixi əhəmiyyət daşıyıb. Məhəmməd Əmin Rəsulzadənin rəhbərliyi ilə qurulan AXC qısa müddətdə demokratik dövlət quruculuğu istiqamətində mühüm addımlar atıb.

Cümhuriyyət dövründə qadınlara seçki hüququ verilib, milli ordu formalaşdırılıb, dövlət atributları təsis olunub, parlament yaradılıb, milli valyuta və bank sistemi qurulub. Azərbaycan həm də beynəlxalq münasibətlər sistemində tanınmağa başlayıb.

Azərbaycan Xalq Cümhuriyyətinin ilk hökumət başçısı Fətəli Xan Xoyski olub. 1918-ci il noyabrın 9-da isə üçrəngli dövlət bayrağı qəbul edilib və bu bayraq milli dövlətçiliyimizin əsas rəmzinə çevrilib.

Cəmi 23 ay fəaliyyət göstərən AXC 1920-ci ildə bolşevik işğalı nəticəsində süqut etsə də, istiqlal ideyası xalqın yaddaşından silinməyib. 1991-ci ildə Azərbaycan yenidən dövlət müstəqilliyini bərpa edib.

2021-ci ildə qəbul edilən “Müstəqillik Günü haqqında” qanuna əsasən, 28 May rəsmi olaraq Müstəqillik Günü elan olunub. Bu əlamətdar gün artıq bir neçə ildir işğaldan azad edilmiş torpaqlarda da böyük qürur və sevinc hissi ilə qeyd olunur.

Bu gün ölkə üzrə müxtəlif tədbirlər keçirilir, Azərbaycan Xalq Cümhuriyyətinin qurucularının əziz xatirəsi ehtiramla yad edilir.

Müstəqillik Günümüz mübarək!