Şamaxı şəhərində ağır cinayət hadisəsi baş verib. Naməlum şəxslər şəhər sakininə fiziki zor tətbiq edərək içərisində 10 kiloqramdan artıq qızıl-zinət əşyaları olan çantanı quldurluq yolu ilə ələ keçiriblər. Hadisə yerindən uzaqlaşan şəxslər hüquq-mühafizə orqanlarının təxirəsalınmaz tədbirləri nəticəsində qısa zamanda müəyyən edilib.

Daxili İşlər Nazirliyinin Mətbuat Xidmətindən verilən məlumata görə, cinayətin Şamaxı sakinləri – 23 yaşlı Güloğlan Kərimov, 21 yaşlı Elcan Beydiyev və 18 yaşlı Qafur Baloğlanov tərəfindən törədildiyi aşkarlanıb. Onların hadisə zamanı istifadə etdikləri avtomobil Hacıqabul rayonu ərazisindəki polis postunda saxlanılmaq istənilsə də, əmri yerinə yetirməyərək hərəkətlərini davam etdiriblər.

Cinayətkarlar daha sonra avtomobili tərk edərək Şirvan şəhərindəki bataqlıq ərazidə gizlənməyə cəhd göstəriblər. Lakin onların yeri müəyyən edilərək hər üç nəfər saxlanılıb. Aparılmış əməliyyat-axtarış tədbirləri nəticəsində talanan qızıl-zinət əşyaları tam həcmdə maddi sübut kimi götürülüb və zərərçəkmiş şəxsə qaytarılıb.

Faktla bağlı cinayət işi başlanılıb, istintaq tədbirləri davam etdirilir.