Bakının Nizami rayonu, Babək prospektində yerləşən təkər bazarında yanğın olub.

Fövqəladə Hallar Nazirliyinin məlumatına görə, “112” qaynar telefon xəttinə daxil olan məlumat əsasında Dövlət Yanğından Mühafizə Xidmətinin qüvvələri hadisə yerinə cəlb olunub.

Əməliyyat şəraitinin qiymətləndirilməsi zamanı müəyyən edilib ki, yanğın ümumi sahəsi 1,5 hektar olan bazarın ərazisində, bir dam altında yerləşən mağazalarda baş verib və yayılma riski yüksək olub.

Yanğınsöndürənlərin operativ müdaxiləsi nəticəsində alovun genişlənməsinə və bazar ərazisinə yayılmasına imkan verilməyib. Nəticədə, hər birinin sahəsi 75 m² olan iki avtomobil ehtiyat hissələri mağazasının dam örtüyü və içərisindəki ehtiyat hissələri yanıb.

Bazarın digər obyektləri yanğından qorunub.