Ukrayna ordusunun son bir həftə ərzində üçüncü dəfə Xəzər dənizində Rusiyaya məxsus neft platformasına zərbə endirdiyi bildirilir.

“Reuters” agentliyinin Ukraynanın təhlükəsizlik xidmətindəki adı açıqlanmayan mənbəyə istinadən yaydığı məlumata görə, hücum uzaqmənzilli pilotsuz uçuş aparatları vasitəsilə həyata keçirilib və “Korçaqin” neft platforması hədəf alınıb.

Ukrayna rəsmiləri hadisə ilə bağlı hələlik rəsmi açıqlama verməyib. Bununla belə, əvvəlki oxşar hücumlar rəsmi səviyyədə təsdiqlənmişdi.

Məlumata görə, dekabrın 12-də Ukrayna Təhlükəsizlik Xidmətinin rəsmisi ordunun Xəzər dənizində yerləşən “Filanovski” və “Korçaqin” neft platformalarına hücum etdiyini açıqlamışdı. Həmin həftənin əvvəlində isə yalnız “Filanovski” platformasının hədəf alındığı bildirilmişdi.

Qeyd olunur ki, hər iki platforma Rusiyanın “Lukoil” şirkətinə məxsusdur. Platformalara vurulan zərərin miqyası barədə məlumat verilməsə də, işlərin müvəqqəti dayandırıldığı bildirilir.

Bu hücumlar Ukraynanın 2022-ci ildən bəri Rusiya ilə davam edən müharibə çərçivəsində Xəzər dənizində həyata keçirdiyi ilk zərbələr kimi qiymətləndirilir.

Ukrayna tərəfi bu cür hücumları Rusiyanın müharibəni maliyyələşdirmək imkanlarını məhdudlaşdırmaq məqsədi ilə izah edir. Rusiya isə ənənəvi olaraq bu hücumları mülki infrastruktura zərbə və terror aktı kimi qiymətləndirir.