“Toplum TV”nin əməkdaşı, jurnalist Fərid İsmayılovun həbs olunmasından bir il keçir.

Fərid İsmayılov “Toplum TV işi” çərçivəsində 2024-cü il martın 6-da saxlanılıb. O, ilkin mərhələdə polis nəzarətinə verilsə də, 2025-ci il yanvarın 17-də Xətai Rayon Məhkəməsinin qərarı ilə barəsində həbs qətimkan tədbiri seçilib.

Jurnalist məhkəmə proseslərində dəfələrlə heç bir cinayət törətmədiyini, yalnız peşə fəaliyyəti ilə bağlı həbs olunduğunu bildirib. O, çıxışlarının birində saxlanılma anını belə təsvir edib:

“Yanvarın 17-də səs-küyə yuxudan ayıldım. Maskalı şəxs yatağıma tullanıb, əllərimi bağladı. Təxminən 10 polis evi axtardı. İlk anda oğurluq olduğunu düşündüm, polis yazısını görəndə rahatladım. Amma yenə hüquq yox idi”.

F.İsmayılov bildirib ki, istintaq orqanları indiyədək ona qarşı konkret sübut təqdim etməyib. Onun sözlərinə görə, Dövlət Gömrük Komitəsi və Mərkəzi Bank tərəfindən təqdim edilən sənədlərdə də pul və ya qanunsuz maliyyə əməliyyatlarının olmadığı göstərilib.

Jurnalistə qarşı irəli sürülən ittihamlarla bağlı o qeyd edib ki:
• 49 şahid ifadə verib və hamısı onu jurnalist kimi tanıdığını bildirib;
• qanunsuz sahibkarlıq, çirkli pulların yuyulması və qaçaqmalçılıq iddiaları sübut olunmayıb;
• istintaqın əsas “dəlil” kimi göstərdiyi 3100 avronun evdə saxlanılması cinayət sayıla bilməz.

F.İsmayılov vurğulayıb ki, araşdırmaları zamanı korrupsiya faktlarını üzə çıxardığı üçün hədəfə çevrilib:

“Mənim yeganə ‘cinayətim’ jurnalistika ilə məşğul olmaq və dostlarımı tək qoymamaqdır. Buna görə də peşman deyiləm”.

“Toplum TV işi” üzrə vəziyyət

“Toplum TV işi” üzrə ümumilikdə 10 nəfər barəsində cinayət işi açılıb. Həbs edilənlər arasında:
• III Respublika Platformasının spikeri Akif Qurbanov,
• qurucu heyət üzvü Ruslan İzzətli,
• “Toplum TV”-nin həmtəsisçisi Ələsgər Məmmədli,
• videoredaktor Müşfiq Cabbar,
• jurnalist Fərid İsmayılov,
• Demokratik Təşəbbüslər İnstitutunun əməkdaşları Əli Zeynal, İlkin Əmrahov və Ramil Babayev var.

Jurnalist Elmir Abbasov polis nəzarətinə verilib, “Toplum TV”nin redaktoru Şahnaz Bəylərqızı isə əvvəlcə ev dustaqlığına buraxılıb, daha sonra polis nəzarətinə götürülüb.

İttiham olunanlar əvvəlcə qaçaqmalçılıq maddəsi ilə təqsirləndirilsələr də, sonradan ittihamlar ağırlaşdırılıb. Onların hamısı ittihamları rədd edir və siyasi sifariş əsasında həbs olunduqlarını bildirirlər.

Qeyd edək ki, 2023-cü ilin noyabrından etibarən Azərbaycanda təxminən 30 jurnalist və ictimai fəal oxşar ittihamlarla həbs edilib.