Fransada siyasi mühacir həyatı yaşayan bir qrup azərbaycanlı siyasi fəal Strasburq şəhərində, Avropa Şurası Parlament Assambleyasının (AŞPA) binası qarşısında etiraz aksiyası keçirib.

Aksiya iştirakçıları Azərbaycanda siyasi motivlərlə həbs olunduğu bildirilən şəxslərə azadlıq tələb ediblər. Etirazçılar xüsusilə Azərbaycan Xalq Cəbhəsi Partiyasının (AXCP) sədri Əli Kərimlinin, eləcə də digər həbsdə olan siyasi fəalların azadlığa buraxılması çağırışları ilə çıxış ediblər.

Fəallar əllərində plakatlar və şüarlar tutaraq Azərbaycanda insan hüquqları və siyasi azadlıqların vəziyyətinə diqqət çəkməyə çalışıblar. Onlar beynəlxalq təşkilatları, xüsusilə Avropa Şurasını Azərbaycandakı siyasi həbslərlə bağlı mövqeyini sərtləşdirməyə çağırıblar.

Aksiya dinc şəkildə keçirilib və yerli təhlükəsizlik qüvvələrinin nəzarəti altında başa çatıb. Etirazçılar bu cür aksiyaların gələcəkdə də davam etdiriləcəyini bildiriblər.

Qeyd edək ki, son illər xaricdə yaşayan azərbaycanlı siyasi fəallar müxtəlif beynəlxalq platformalarda Azərbaycanda siyasi məhbuslarla bağlı məsələni gündəmdə saxlamağa çalışırlar.