Mətbuat azadlığını müdafiə edən beynəlxalq təşkilat Free Press Unlimited 2025-ci il üçün Free Press Awards mükafatlarının qaliblərini elan edib. Mükafatın bu ilki laureatları Sudanlı jurnalist Əlmigdad Həsən və azərbaycanlı jurnalist Ülviyyə Quliyeva olub.

Münsiflər heyətinin qərarına əsasən, Əlmigdad Həsən “İlin yeni jurnalisti – Hans Verploeg mükafatı”, Ülviyyə Quliyeva isə “Ən dözümlü jurnalist” mükafatına layiq görülüb. Münsiflər qalibləri jurnalistikanın ictimai maraqlara xidmətini ən ağır şəraitdə belə davam etdirmələri, peşəkar cəsarətləri və fəaliyyətlərinin real ictimai təsiri ilə fərqləndiklərinə görə seçiblər.

“Ən dözümlü jurnalist” mükafatına layiq görülən Ülviyyə Quliyeva hazırda Bakı İstintaq Təcridxanasında saxlanılır. O, azadlıqdan məhrum edilməsinə baxmayaraq, həbsxanadan reportajlar hazırlamağa, insan hüquqları pozuntularını sənədləşdirməyə və siyasi məhbusların səsini ictimaiyyətə çatdırmağa davam edir. Münsiflər heyəti onun jurnalist fəaliyyətini fiziki zorakılıq, təzyiq və ciddi risklər şəraitində davam etdirməsini xüsusi vurğulayıb.

“İlin yeni jurnalisti” mükafatının qalibi Əlmigdad Həsən isə 2023-cü ildə Sudanda müharibə başlayandan sonra Xartumda fəaliyyətini davam etdirən azsaylı jurnalistlərdən biridir. O, əsasən mobil telefon vasitəsilə çəkilişlər apararaq bombardman olunan ərazilərdən və aktiv döyüş zonalarından reportajlar hazırlayıb. Onun materialları Sudandakı münaqişənin beynəlxalq ictimaiyyətə çatdırılmasında mühüm rol oynayıb.

Qeyd edək ki, Free Press Awards 2025 çərçivəsində Ülviyyə Quliyeva peşəkar jurnalist fəaliyyətinə və ictimai əhəmiyyətli mövzuların gündəmə gətirilməsinə görə 10 min avro məbləğində pul mükafatı ilə təltif olunub.

Mükafatlar fevralın 3-də Niderlandın Haaqa şəhərində keçirilən Free Press Live tədbiri çərçivəsində təqdim edilib. Tədbir mətbuat azadlığı, müstəqil jurnalistikanın qorunması və doğru informasiyaya çıxış uğrunda qlobal mübarizəyə həsr olunub.









Kamran Nəsirli