Buraxılış və qəbul imtahanlarına qanunsuz texniki vasitələrin keçirilməsi ilə bağlı cinayət işi üzrə növbəti məhkəmə prosesi keçirilib.

Proses Gəncə Şəhər Məhkəməsində hakim Elçin Məmmədovun sədrliyi ilə baş tutub. İclasda təqsirləndirilən şəxslər – tanınmış təhsil eksperti Kamran Əsədov və Gündüz Abbasov, həmçinin şahidlər, zərərçəkmiş şəxslər və Dövlət İmtahan Mərkəzinin nümayəndələri iştirak ediblər.

Məhkəmə prosesində şahidlərin ifadələri dinlənilib. Bildirilib ki, növbəti iclas martın 5-nə təyin olunub.

İttihamın detalları

Azərbaycan Respublikasının Baş Prokurorluğunun yaydığı məlumata əsasən, ali məktəblərə qəbul və buraxılış imtahanlarında iştirak edən şəxslərə imtahan qaydalarına zidd şəkildə köməklik göstərilməsi barədə daxil olmuş məlumat əsasında cinayət işi başlanıb. Məlumatın Dövlət Təhlükəsizliyi Xidmətinə təqdim edildiyi, ibtidai istintaqın isə Baş Prokuror yanında Korrupsiyaya qarşı Mübarizə Baş İdarəsi tərəfindən aparıldığı qeyd olunub.

İstintaq materiallarına görə, Gündüz Abbasovun təşkil etdiyi hazırlıq kursunun abituriyentlərinə imtahan zamanı test suallarının cavablandırılmasına kömək məqsədilə gizli informasiya əldə etmək üçün nəzərdə tutulan texniki vasitələr qanunsuz hazırlanıb və tətbiq edilib. İddialara əsasən, Kamran Əsədovla cinayət əlaqəsinə girilərək ümumilikdə 11 nəfərin üzərinə həmin vasitələr quraşdırılıb.

Bundan əlavə, Sumqayıt şəhərində Hüseynov Sənan Rasim oğlunun xüsusi icazə olmadan 31 ədəd gizli informasiya əldə etməyə imkan verən texniki vasitəni satmasına dair əsaslı şübhələr müəyyən edilib.

Toplanmış sübutlara əsasən:
• Gündüz Abbasova Cinayət Məcəlləsinin 302.3 və 308.1-ci maddələri,
• Kamran Əsədova 302.3 və 32.5, 308.1-ci maddələri,
• Sənan Hüseynova isə 302.3-cü maddə ilə ittiham elan edilib.

Gündüz Abbasov barəsində məhkəmənin qərarı ilə həbs qətimkan tədbiri seçilib. Digər təqsirləndirilən şəxslər barəsində isə həbslə bağlı olmayan qətimkan tədbirləri tətbiq olunub.

Qeyd edək ki, Kamran Əsədov yanvarın 23-də keçirilən əvvəlki məhkəmə iclasında məhkəmə zalında həbs edilib.

Cinayət işi üzrə məhkəmə araşdırması davam edir.