USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
Rəsmi Bakı Rusiya kanalında göstərilən xəritəyə etiraz edib
Azərbaycan Xarici İşlər Nazirliyi Rusiyanın dövlət televiziyası olan Birinci Kanalda yayımlanan “Vremya pokaĵet” proqramında Azərbaycanın təhrif olunmuş xəritəsinin nümayiş etdirilməsinə etiraz bildirib.
XİN-in mətbuat katibi Ayxan Hacızadə yerli medianın sorğusuna cavabında qeyd edib ki, mayın 6-da efirə gedən proqramda Azərbaycan xəritəsində “Dağlıq-Qarabağ” ifadəsinin göstərilməsi “ciddi təxribat və qəbuledilməz siyasi manipulyasiya”dır.
Onun sözlərinə görə, Azərbaycanın suverenliyi və ərazi bütövlüyü tam bərpa olunub və bu, beynəlxalq ictimaiyyət, o cümlədən Rusiya tərəfindən tanınır.
“Rusiya tərəfindən Azərbaycanın ərazi bütövlüyü və suverenliyinə hörmətin dəfələrlə bəyan olunmasına baxmayaraq, dövlət televiziyasında köhnə və separatizmi təşviq edən narrativlərin yayılması Azərbaycan-Rusiya münasibətlərinin ruhuna ziddir”, – deyə Hacızadə bildirib.
XİN rəsmisi əlavə edib ki, dövlətə məxsus media qurumlarında belə yanaşmalar yolverilməzdir və Azərbaycan tərəfi Rusiyadan məsələyə aydınlıq gətirilməsini, həmçinin oxşar halların təkrarlanmaması üçün tədbir görülməsini gözləyir.
Məsələ mayın 6-da “Vremya pokaĵet” proqramında yayımlanan xəritədə “Dağlıq-Qarabağ” adlı ərazinin ayrıca qeyd olunmasından sonra gündəmə gəlib.
2020-ci ildə baş vermiş İkinci Qarabağ müharibəsindən sonra Azərbaycan Qarabağın bir hissəsinə və ətraf rayonlara nəzarəti bərpa edib. 2023-cü ilin sentyabrında keçirilən lokal hərbi əməliyyatlardan sonra isə rəsmi Bakı ölkənin suverenliyinin tam təmin olunduğunu bəyan edib.
