USD
1.7000
%0,47
EUR
2.0183
%0,47
GBR
2.3633
%0,47
RUB
0.0232
%0,47
TRY
0.2009
%0,47
“Toplum TV işi” üzrə məhkəmə hökmü açıqlandı
İyulun 27-də Bakı Ağır Cinayətlər Məhkəməsində “Toplum TV işi” üzrə sonuncu məhkəmə prosesi keçirilib.
Hakim Azər Tağıyevin sədrliyi ilə keçirilən iclasda təqsirləndirilən şəxslər son sözlə çıxış etdikdən sonra hökm elan olunub.
Məhkəmənin qərarı ilə Demokratik Təşəbbüslər İnstitutunun rəhbəri Akif Qurbanov 15 il, “Toplum TV”nin həmtəsisçisi Ələsgər Məmmədli 14 il, siyasətçi Ruslan İzzətli 15 il müddətinə azadlıqdan məhrum edilib.
Demokratik Təşəbbüslər İnstitutunun əməkdaşları Ramil Babayev 13 il, Əli Zeynal 14 il, İlkin Əmrahov isə 13 il həbs cəzası alıb.
“Toplum TV” əməkdaşlarından Müşfiq Cabbar 13 il, Fərid İsmayılov 12 il, Elmir Abbasov isə 11 il 11 ay 28 gün müddətinə azadlıqdan məhrum olunub.
“Toplum TV işi” üzrə ümumilikdə 10 nəfər barəsində cinayət işi başlanıb. Təqsirləndirilən şəxslərə əvvəlcə qaçaqmalçılıq ittihamı irəli sürülsə də, sonradan ittihamlar ağırlaşdırılıb.
Jurnalistlər və fəallar ittihamları qəbul etmir, həbslərinin siyasi sifariş əsasında həyata keçirildiyini bildirirlər.
Həbs olunan şəxslərdən bəzilərinin səhhətində ciddi problemlərin olduğu qeyd olunur. Onların yaxınları və müdafiəçiləri uzunmüddətli həbs cəzalarının məhbusların sağlamlığı və həyatı üçün ağır nəticələr yarada biləcəyindən narahatdırlar.
Bu isə əsas sualı gündəmə gətirir: səhhətində ciddi problemlər olan məhbusların həyatına və təhlükəsizliyinə kim cavabdehlik daşıyacaq?
