Azərbaycanda 5,4 milyon manatdan artıq dəyəri olan aksiz markasız tütün məmulatlarının qaçaqmalçılığı ilə bağlı cinayət işi üzrə beynəlxalq axtarışa verilmiş Azərbaycan vətəndaşı Ənvər Tağıyev Ukraynada saxlanılıb.

Baş Prokurorluğun məlumatına görə, Ukrayna Baş Prokurorluğuna edilən müraciət əsasında Ənvər Tağıyevin Azərbaycana ekstradisiyası ilə bağlı razılıq əldə olunub.

İstintaq Tağıyevin aksiz markası ilə markalanmalı olan tütün məmulatlarını belə marka olmadan satış məqsədilə saxlamasına dair əsaslı şübhələrin müəyyən edildiyini bildirir.

Söhbət ötən ilin dekabrından Baş Prokuror yanında Korrupsiyaya qarşı Mübarizə Baş İdarəsinin araşdırdığı iri qaçaqmalçılıq işindən gedir.

İstintaqın versiyasına görə, Birləşmiş Ərəb Əmirlikləri və İrandan 5,4 milyon manatdan artıq dəyərdə aksiz markası olmayan tütün məmulatları gəmilərlə Bakı Hövsan Beynəlxalq Ticarət Dəniz Limanı və Qaradağ–Ələt ərazisində yerləşən qanunsuz körpü vasitəsilə Azərbaycana gətirilib.

Cinayət işi üzrə liman və gömrük əməkdaşları, gəmi kapitanları və heyət üzvləri, eləcə də Dövlət Sərhəd Xidmətinin bəzi vəzifəli şəxsləri məsuliyyətə cəlb olunublar.

Təqsirləndirilənlər arasında “Bakı Hövsan Beynəlxalq Ticarət Dəniz Limanı” ASC-nin baş direktoru Rəşad Daşdəmirov, liman xidmətinin rəisi Zaur Haşımov, gömrük postunun rəisi Fərid Usubov, inspektorlar Heydər Eyvazlı və Tamerlan Axundzadə də var.

Fərid Usubov Xüsusi Dövlət Mühafizə Xidməti rəisinin keçmiş müavini, general-leytenant Cəbrayıl Usubovun oğludur.

Cinayət işi çərçivəsində Prezidentin Mühafizə Xidmətinin keçmiş rəisi, general-polkovnik Bəylər Eyyubovun qardaşı oğlu Ruslan Eyyubov da saxlanılmışdı. O, iyunun 4-də Binəqədi Rayon Məhkəməsinin qərarı ilə səhhətindəki problemlər nəzərə alınaraq ev dustaqlığına buraxılıb. Onun barəsindəki cinayət işi ayrıca icraata ayrılıb.

İş üzrə təqsirləndirilən şəxslərə mütəşəkkil dəstə tərəfindən külli miqdarda qaçaqmalçılıq, aksiz markası olmayan malları satış məqsədilə saxlama və ağır nəticələrə səbəb olan vəzifə səlahiyyətlərindən sui-istifadə maddələri ilə ittihamlar irəli sürülüb.

Bu ittihamlar üzrə 12 ilədək azadlıqdan məhrumetmə cəzası nəzərdə tutulur.

Təqsirləndirilən şəxslər barəsində yekun məhkəmə hökmü hələ çıxarılmayıb.