İqtisadçı alim Qubad İbadoğlunun Azərbaycandan çıxışına qoyulan məhdudiyyət aradan qaldırılıb. O, sentyabrın 29-da səhər saatlarında ölkəni tərk edərək Almaniyaya gedib.

Qubad İbadoğlu bildirib ki, xaricə çıxış qadağası səhhəti ilə əlaqədar ləğv olunub.

“Müayinə, müalicə və zərurət yaranarsa, ürəyimdən açıq tibbi əməliyyat olunmaq üçün Almaniyaya gəldim”, – iqtisadçı deyib.

Məsələ ilə bağlı Azərbaycan rəsmi qurumlarının açıqlaması hələlik yayılmayıb.

Qubad İbadoğlu 23 iyul 2023-cü ildə həbs olunub. Ona qarşı Cinayət Məcəlləsinin saxta pul və ya xarici valyutanın satış məqsədilə hazırlanması, əldə edilməsi və ya satılması, bu əməllərin mütəşəkkil dəstə tərəfindən törədilməsi ilə bağlı maddəsi üzrə ittiham irəli sürülüb.

Daha sonra iqtisadçıya qarşı dini ekstremist materialların hazırlanması, saxlanması və ya yayılması ilə bağlı əlavə ittiham da irəli sürülüb.

Qubad İbadoğlu ittihamları qəbul etməyib və onların əsassız olduğunu bildirib.

22 aprel 2024-cü ildə onun barəsində seçilmiş həbs qətimkan tədbiri səhhətində yaranmış problemlərlə əlaqədar ev dustaqlığı ilə əvəz olunub. Sonradan isə barəsində polis nəzarəti altında qətimkan tədbiri tətbiq edilib.

İqtisadçı dövlət qeydiyyatına alınmayan Azərbaycan Demokratiya və Rifah Partiyasına rəhbərlik edib. Onun həbsdən ev dustaqlığına buraxılmasından bir müddət sonra partiyanın fəaliyyətinin dayandırılması barədə qərar qəbul olunub.

Partiyanın İdarə Heyəti fəaliyyətə xitam verilməsini qurumun rəsmi dövlət qeydiyyatına alınmaması ilə əsaslandırıb.