Kənd təsərrüfatı naziri Məcnun Məmmədov noyabrın 13-də parlamentin Aqrar siyasət, Ailə, qadın və uşaq məsələləri, Elm və təhsil komitələrinin birgə iclasında 2025-ci il üçün əkin subsidiyalarının məbləğinin 290 milyon manat olacağını açıqlayıb. Nazir bildirib ki, bu məbləğ cari ilin büdcəsi ilə müqayisədə 6 milyon manat və ya 2 faiz az, 2024-cü illə müqayisədə isə 16 milyon manat və ya 5,8 faiz çoxdur.

Kənd təsərrüfatı üzrə ekspert Vahid Məhərrəmli bildirib ki, Azərbaycanda subsidiyaların verilməsində ciddi problemlər mövcuddur. O qeyd edib ki, kəndlilər subsidiyaları vaxtında ala bilmədiklərinə görə aqro-texniki qaydalara tam əməl edə bilmir, lazımi qədər gübrə və pestisid əldə edə bilmirlər, texniki işləri isə ixtisara salırlar. Yanacaq qiymətlərinin artımı da fermerlərin xərclərini artırır.

Ekspertin fikrincə, subsidiya ödənişlərində şəffaflıq problemi var və əsas payı oliqarx məmurlar alır: “Çünki onlar daha çox əkin sahəsini ələ keçiriblər və intensiv bağçılıq sahələrinə üstünlük verirlər. Halbuki bitkiçilikdə dənli bitkilər, kartof, tərəvəz, heyvandarlıqda isə ət, süd və kərə yağı üzrə məhsuldarlığın artırılması üçün daha çox subsidiya ayrılmalıdır”.

V.Məhərrəmli dövlətin fermerlərə subsidiyanı əkindən əvvəl ödəməsi və ödənişlərin şəffaflığının təmin olunmasının vacibliyini vurğulayıb.