Ümumdünya Səhiyyə Təşkilatının INFOSAN şəbəkəsindən daxil olan rəsmi məlumata görə, ABŞ-da “ByHeart Whole Nutrition Infant Formula” adlı uşaq qidasının istehlakı körpələr arasında botulizm hallarına səbəb olub.

Azərbaycan Qida Təhlükəsizliyi Agentliyinin (AQTA) məlumatına əsasən, ABŞ Xəstəliklərə Nəzarət və Profilaktika Mərkəzi 2025-ci il 17 noyabr tarixinədək 13 ştat üzrə 23 şübhəli və təsdiqlənmiş yoluxma halı qeydə alındığını və bütün xəstələrin xəstəxanaya yerləşdirildiyini bildirib. Bunun ardınca ABŞ-da həmin məhsulun bütün partiyalarının və qablaşdırmalarının istifadəsinin dərhal dayandırılması tövsiyə olunub.

Botulizm nədir?

Botulizm ağır və ölümcül nəticələrə səbəb ola bilən xəstəlikdir. Adətən Clostridium botulinum bakteriyası ilə çirklənmiş qidalar vasitəsilə formalaşan toksinlərin qəbulundan yaranır. Xəstəliyin əsas simptomları bunlardır:
• qəbizlik
• iştahsızlıq
• halsızlıq
• zəif ağlama
• başı şaquli saxlamaqda çətinlik
• zəif emosiya ifadəsi

Məhsul Azərbaycana idxal olunmayıb

AQTA-nın araşdırmaları nəticəsində məlum olub ki, “ByHeart Whole Nutrition Infant Formula” ölkəyə idxal edilməyib. Lakin məhsulun Amazon.com və digər onlayn platformalar vasitəsilə şəxsi qaydada sifariş olunması mümkündür. Agentlik bildirir ki, fərdi qaydada ölkəyə gətirilən bu məhsulların istifadəsi potensial risk yaradır.

AQTA məhsulla bağlı mövcud təhlükələr barədə internet resursları və digər kommunikasiya kanalları vasitəsilə ictimaiyyəti məlumatlandırıb. INFOSAN tərəfindən yeni məlumat təqdim ediləcəyi təqdirdə, Agentlik yenilənmiş məlumatı ictimaiyyətə çatdıracaq.

Xəbərdarlıq

Valideynlərə onlayn platformalardan alınmış uşaq qidalarının etibarlılığını diqqətlə yoxlamaları tövsiyə olunur.