Azərbaycan və Gürcüstan hər zaman regionda sülhün və sabitliyin tərəfdarı olublar,- cümə axşamı Gürcüstanın xarici işlər naziri Maka Boçorişvili Azərbaycanın xarici işlər naziri Ceyhun Bayramov ilə birgə keçirdiyi mətbuat konfransında bildirib.

O deyib ki, Azərbaycan və Gürcüstan bir çox məsələlərdə intensiv əməkdaşlıq edirlər və "Gürcüstana müxtəlif formatlarda göstərdiyi dəstəyə görə" Azərbaycana təşəkkür edib.


Azərbaycan və Gürcüstan arasında münasibətlər regionda çox mühüm rol oynayır. Boçorişvili Gürcüstanın böyük iqtisadi tərəfdaşı kimi Azərbaycanın rolunu qeyd edib.

Öz növbəsində Azərbaycanın xarici işlər naziri Ceyhun Bayramov deyib ki, görüşdə "bütün region üçün faydalı olacaq mühüm iqtisadi layihələr müzakirə olunub”.

"Ümid edirəm ki, yaxın vaxtlarda Azərbaycan, Türkiyə və Gürcüstan Xarici İşlər nazirlikləri rəhbərlərinin görüşü olacaq və biz daha maraqlı layihələri müzakirə edəcəyik", - o deyib. Belə layihələrdən biri fiber-optik rabitə xətlərinin yaradılmasıdır.

Bayramov əlavə edib ki, ikitərəfli əməkdaşlıq üzrə hökumətlərarası komissiyanın iclası zamanı bu ideyalarla bağlı ətraflı fikir mübadiləsi aparılacaq.

Ermənistanla sülh danışıqlarına toxunan Bayramov sülh sazişinin reallaşmasında böyük irəliləyişin olduğunu qeyd edib. "Eyni zamanda, Ermənistan Konstitusiyasında Azərbaycanın ərazi bütövlüyünə qarşı müddəaların qalması narahatlıq doğurur", - o deyib. Ceyhun Bayramov həmçinin "Ermənistanın aktiv silahlanmasından" narahatlığını ifadə edib.