Türkiyənin əsas müxalifət partiyası – Cümhuriyyət Xalq Partiyası (CHP) İstanbul Böyükşəhər Bələdiyyəsinin həbs edilən sədri Əkrəm İmamoğlunu rəsmi olaraq "prezidentliyə namizəd" elan edib.

Partiya rəsmi açıqlamanı X hesabında İmamoğlunun "Yolumuz uzun, həyəcanımız yüksək, gəncliyimiz var" sözlərini paylaşaraq yayıb.

Silivri Həbsxanasına göndərilən Əkrəm İmamoğlunun yeganə namizəd olduğu ilkin seçki üçün martın 23-də Türkiyə üzrə 81 vilayətdə və 973 rayonda seçki qutuları qurulub. Partiya üzvləri səhər erkən saatlardan etibarən səsvermə məntəqələrinə axışıb, üzv olmayan vətəndaşlar isə səslərini "həmrəylik sandıqları" vasitəsilə veriblər.

Partiyanın sədri Özgür Özəl prezidentliyə namizədi müəyyən etmək üçün təxminən 15 milyon insanın iştirak etdiyini bildirib.

Özəl ortaya çıxan mənzərənin "vaxtından əvvəl seçkini qaçılmaz etdiyini" söyləyib.

Müstəqil mənbələr açıqlanan bu məlumatları hələ təsdiqləməyib.

Əkrəm İmamoğlunun sosial media hesabından da paylaşım edilib.

"15 milyon vətəndaşımız səs verdi. Hakimiyyətin zülmündən, məhv edilən iqtisadiyyatdan, ləyaqətsiz idarəçilikdən və qanunsuzluqdan əziyyət çəkən bu ölkənin milyonlarla insanı sandıqlara axışdı. Ərdoğana “artıq bəsdir” dedi," – İmamoğlunun adından yayımlanan paylaşımda bildirilib.

Martın 23-də İstanbul Böyükşəhər Bələdiyyə (İBB) sədri Əkrəm İmamoğlu barəsində korrupsiya istintaqı çərçivəsində həbs qətimkan tədbiri seçilib.

İstanbul Cəza Məhkəməsi prokurorun bələdiyyə sədrinin həbsi ilə bağlı vəsatətini təmin edib.

İmamoğlu terrorla bağlı istintaq üzrə isə şərti olaraq sərbəst buraxılıb.

Əkrəm İmamoğlu ittihamları rədd edərək əməliyyatların siyasi xarakter daşıdığını deyib.