Malta sahilləri yaxınlığında Qəzzaya humanitar yardım aparan mülki gəmi dron hücumuna məruz qalıb. “Azadlıq Donanması” koalisiyası insidentsə görə İsraili ittiham edərək, beynəlxalq hüququn pozulduğunu bəyan edib.

Təşkilatın məlumatına görə, “Conscience” (“Vicdan”) adlı gəmi Malta vaxtı ilə saat 00:23-də beynəlxalq sularda silahlı pilotsuz təyyarələrin hücumuna məruz qalıb. Gəminin ön hissəsinə iki dəfə zərbə endirildiyi və nəticədə güclü yanğınla yanaşı, gövdəsində ciddi zədələr yarandığı bildirilib. Qəza nəticəsində gəminin generatoru sıradan çıxıb və gəmi batmaq təhlükəsi ilə üzləşib.

Gəmidə 12 ekipaj üzvü və 4 mülki sərnişin olub. Hazırda xəsarət alanlar barədə məlumat verilməyib. Malta hökuməti gəmiyə kömək üçün yaxınlıqdakı yedək gəmisinin göndərildiyini açıqlayıb.

“The Guardian” nəşrinin yazdığına görə, sosial şəbəkələrdə yayılan fotolarda gəminin göyərtəsində alovlar və partlayışlar müşahidə olunur. Lakin hücumun pilotsuz təyyarələr tərəfindən həyata keçirildiyinə dair rəsmi təsdiq və əlavə sübutlar hələ təqdim olunmayıb.

“Azadlıq Donanması” koalisiyası bildirib ki, gəmidə 21 ölkədən olan aktivistlər İsrailin Qəzza zolağına tətbiq etdiyi “qanunsuz və ölümcül blokadaya” etiraz etmək və regiona təcili humanitar yardım çatdırmaq məqsədilə iştirak ediblər.

Koalisiya İsrail səfirlərinin beynəlxalq hüququn pozulmasına görə məsuliyyətə cəlb olunmasını tələb edir. İsrail tərəfi isə hələlik bu ittihamlarla bağlı heç bir açıqlama verməyib.