Azərbaycanın xarici işlər naziri Ceyhun Bayramov 21 iyun 2025-ci il tarixində İslam Əməkdaşlıq Təşkilatının Xarici İşlər Nazirləri Şurasının 51-ci sessiyası çərçivəsində İstanbulda Suriyanın keçid hökumətinin xarici işlər və xaricdə yaşayan suriyalılar naziri Əssad Həsən Əş-Şibani ilə görüşüb.

Görüşdə Azərbaycan və Suriya arasında ikitərəfli münasibətlərin bərpası və inkişafı, regional təhlükəsizlik məsələləri, o cümlədən Yaxın Şərqdəki gərginliklər müzakirə olunub. Ceyhun Bayramov Dəməşqdə Azərbaycanın səfirliyinin fəaliyyətinin bərpasını ikitərəfli münasibətlərdə yeni mərhələ kimi qiymətləndirib və siyasi dialoq, iqtisadi və humanitar əməkdaşlığın genişləndirilməsinin vacibliyini vurğulayıb.

Azərbaycanın Suriyada sabitliyin və dayanıqlı sülhün bərqərar olunmasını dəstəklədiyi, Suriyanın bərpası prosesində iştirak etməyə və humanitar yardımı davam etdirməyə hazır olduğu bildirilib. Həmçinin, Suriyaya qarşı tətbiq olunan birtərəfli sanksiyaların ləğv olunması təqdir olunub və bu addımın ölkənin bərpası və regional inteqrasiyasına dəstək verəcəyi qeyd edilib.

Görüş zamanı regional və beynəlxalq təşkilatlar çərçivəsində əməkdaşlığın davam etdirilməsinin əhəmiyyəti, İsrail-İran qarşıdurması nəticəsində yaranan eskalasiyanın diplomatik yollarla həllinin vacibliyi də müzakirə olunub