Dövlət Təhlükəsizliyi Xidmətinin (DTX) Akademiyasında növbəti məzun buraxılışı mərasimi keçirilib. Bu barədə DTX-nin Mətbuat Xidməti məlumat yayıb.

Mərasimdə Azərbaycan Respublikasının Dövlət Himni səsləndirilib, Vətən uğrunda canlarını fəda etmiş şəhidlərin xatirəsi bir dəqiqəlik sükutla yad edilib.

Tədbirdə çıxış edənlər qeyd ediblər ki, dövlətçiliyin təhlükəsizliyini təmin etmək kimi məsul və şərəfli missiyanı yerinə yetirən gənc zabitlər peşəkar bilik və bacarıqlarla silahlanaraq xidmətə hazır vəziyyətdədirlər. Bildirilib ki, Prezident, Silahlı Qüvvələrin Ali Baş Komandanı cənab İlham Əliyevin rəhbərliyi ilə həyata keçirilən islahatlar nəticəsində milli təhlükəsizlik sisteminin gücləndirilməsi, peşəkar kadr potensialının formalaşdırılması istiqamətində ciddi addımlar atılıb və DTX Akademiyası bu prosesdə mühüm rol oynayır.

Məzunlara diplomlar təqdim edilib, fərqlənənlər mükafatlandırılıb. Daha sonra gənc zabitlər Dövlət Təhlükəsizliyi Xidmətinin sıralarında vicdanla və sədaqətlə xidmət edəcəklərinə and içiblər.

Mərasimdə DTX rəhbərliyi, digər dövlət orqanlarının nümayəndələri, akademiya müəllimləri, məzunların valideynləri və qonaqlar iştirak ediblər. Tədbirin sonunda Akademiyanın həyətində hərbi marşlar müşayiəti ilə gənc məzunların təntənəli keçidi baş tutub.

Qeyd edək ki, DTX Akademiyası milli təhlükəsizlik orqanları üçün peşəkar, vətənpərvər və bilikli kadrların hazırlanmasında mühüm təhsil müəssisəsi kimi fəaliyyət göstərir.