Son vaxtlar Azərbaycanla Rusiya arasında artan diplomatik gərginliyə münasibət bildirən Türkiyə Prezidenti Rəcəb Tayyib Erdoğan hər iki tərəfi təmkinli olmağa çağırıb.

Prezident Erdoğan bildirib:

“Gərginliyi yaxından izləyirik və hər iki ölkəni təmkinli olmağa çağırırıq. Diplomatik gərginliyi azaldacaq bəyanatlarla məsələnin daha asan və əsaslı şəkildə həll olunacağına inanırıq. Cənab İlham Əliyev burada çox diqqətli və ehtiyatlı addım atır. O, bu məsələnin ardınca getməyin və bunun qızışdırılmasının tərəfdarı deyil.”

Türkiyə lideri vurğulayıb ki, regionda sülh və sabitlik üçün gərginliyin artması yox, dialoq və əməkdaşlıq yolları ön planda olmalıdır.

Azərbaycanla Rusiya arasında münasibətlər, xüsusilə Yekaterinburqda azərbaycanlılara qarşı keçirilmiş reydlər və bunun əks reaksiyası fonunda pisləşib. Gərginliyin fonunda hər iki ölkədə qarşı tərəfin vətəndaşlarına qarşı hüquq-mühafizə tədbirləri sərtləşib.

Erdoğanın bu açıqlaması Türkiyənin bölgədə balanslaşdırıcı mövqe tutmaqda davam etdiyini və Bakı ilə Moskva arasında diplomatik kanalların açıq qalmasının vacibliyini vurğulayır.